قدم برنامج "حياة كريمة"، المذاع على قناة دي إم سى، ويقدمه أيمن مصطفى، تجربة عمل خيري لسيدة خمسينية تضع يافطة على باب مدخل العقار الذي تسكن فيه في منطقة حلوان، ومكتوب عليها "فاعل خير لتوزيع ملابس مجانا"، وتضع ملابس مستعملة.
وروت صاحبة معرض الملابس عن بداية الفكرة قائلة: "بدأت العمل من عام 2015 وكان عندي حاجات مش باستخدمها وقلت اطلعها لله، وقلت اعملها في مدخل العمارة، وعلقت الهدوم، وأعلنت على صفحتي، وقلت اللي عنده أسر فقيرة أو ناس ظروفها صعبة يعرفهم ويخدوا الملابس مجانا".
وتابعت: "لقيت زمايلي بيوجهوا نفس المشكلة وجابوا لى الحاجة الخاصة بيهم واشتغلت طوال رمضان أني اخلص اللي عندي وبعد رمضان لقيت هدوم كتير لسه وبعدين عملت معرض مدارس وزي مدارس وفي ناس بتجيبلي الهدوم، وبوصل وبعمل معرض في مناطق ضواحي حلوان".
واستكملت: "بقالي 9 سنين مستمرة في عمل الخير وأي حد بيجيب لي حاجة بتبقى مجانا وفي الموسم شغالة كل يوم والخير له طعم تاني".
وأهدى أيمن مصطفى، لصاحبة معرض الملابس المجاني ميدالية أبطال برنامج "حياة كريمة"، فضلا عن مبلغ مالي ليساعدها في دعم المشروع وتوسيع الفكرة لمساعدة المحتاجين من الأسر الفقيرة.
كما استوقف برنامج "حياة كريمة"، المذاع على قناة DMC، ويقدمه أيمن مصطفى، بائع مصاحف في منطقة السادس من أكتوبر، وسأله عن طبيعة عمله ودخله اليوم، وأخبره قائلا: "هي ونصيبها وكلها أرزاق، وكل يوم برزقه ويوم ما بيع ببقى مرضي، وماحدش بينام من غير عشاء، وبشتغل من 8 الصبح إلى 11 بالليل".
وأضاف: "ربنا بيرزقني كل يوم وعندي ولد في كلية الهندسة، وبنت خاتمة القرآن، وعمري ما طلبت مساعدة من حد ومش خايف من بكرة"، وقدم له أيمن مصطفى 500 جنيه هدية من البرنامج ولكنه أخرجهم فور مشاهدته بائع آخر يتعقبه شاب ويريد منه ثمن ايجار الشقة المتأخر وقدرها 500 جنيه.
وعاد أيمن مصطفى، ليستفسر من بائع المصاحف على سبب اخراج كل المبلغ للبائع المتجول ليدفع ايجاره المتأخر ورد عليه: "أنت أدتني الفلوس وهو محتاج ومديت له يد العون وأنا ربنا يرضيني وأي خير تعمله تلاقيه، ومحدش يقول الدنيا والأسعار وربنا هو اللي بيرزق والشعب المصري حنين وبيحب بعضه واللي بيحسب كل حاجة قوي إيمانه ضعيف".
وقدم أيمن مصطفى، لبائع المصاحف ميدالية أبطال حياة كريمة إضافة إلى هدية 50 ألف جنيه بسبب موقفه الإنساني، وعبر عن سعادته قائلا: "مبلغ كبير قوي وما عرفش جت إزاي، وربنا يحفظكم، وعمري ما طلبت من حد حاجة.. وربنا يجعلكم عون للبسطاء والمحتاجين في الأرض".
