تامر الخشاب يكشف كيف يصنع الشيطان الزعيم الوهمى فى أول حلقات الكمين

كشف الإعلامى تامر الخشاب فى أولى حلقات برنامجه كمين والذى يذاع على قناة الحياة كيفية صناعة البطل الوهمى أو الزعيم الوهمى.

وكيف بدأ الإخوان فى تهيئة البيئة المناسبة لصناعة الزعيم الوهمى والالتفاف حوله وكيف مهد لذلك وكيف حاولوا بث السموم فى آذان المواطنين كى يصدقوهم بالكذب والشائعات وتضخيم السلبيات، ورصد عدة نماذج من الحياة فى مقاطع فيديو.

وقال تامر الخشاب: علشان تزرع الزعيم الشعبى الوهمى وسط المجتمع وتخلى الناس تتعاطف معاه وتصدقه وتسمع كلامه بدا فريق البحث يدور على قصة الزعيم الشعبى فى التاريخ القديم والمعاصر ويجمع صفاتهم المشترك ويدرس الظرووف المحيطة بهم وأسباب ظهور الزعيم الشعبى ورصد الاختلافات فى تطور صور وأشكال الزعماء من أول الزعيم الشعبى المحمول على الأعناق حتى الزعيم الشعبى الإلكترونى اللى ممكن تحمله على فلاشة وجدنا أنه علشان تزرع زعيم شعبى وهمى فى المجتمع لازم توفر البيئة الملائمة اللى تخلى الناس تصدقه وتتجمع حواليه يعنى لازم تصنع حالة من المظلومية والقهر فى المجتمع اللى انت عاوز تزرع فيه ولازم تحافظ على الإحساس ده لأكبر فترة ممكنة وبأى طريقة، حتى ولو كان بالكذب أو الشائعات أو تضخيم السلبيات، حتى لو هتقوم بدور الشيطان وتوسوس للمواطن فى ودانه وتكرهه فى عيشته، وكلنا بنشوف ده فى حياتنا اليومية وإحنا كمان رصدناه.

وأضاف: وبكده هتبقى نجحت فى زرع بيئة ملائمة تزرع فيها أى زعيم وهمى وأتوماتيك هتلاقى كل الناس اللى قدرت تحسسهم بالمظلومية والقهر فورا اتجمعوا عليك فطرة بشرية موجودة فى كل البشر ولكن بنسب متفاوتة أول ما يحس بالمظلومية والقهر يبدأ فرا بالبحث عن الزعيم المخلص الزعيم اللى هيشفى غليله الزعيم اللى هيجيبله حقه والفطرة البشرية دى استغلها بعض كتاب الدراما لضمان نجاح أفلامهم وكانوا حريصين على وجود الزعيم المخلص فى أفلامهم حتى لو كان زعيم وهمى وده علشان يضمنوا نجاح الفيلم وجذب أكبر عدد من المتفرجين، لكن سواء أكان البطل وهمى فى الدراما أو زعيم شعبى حقيقى من الواقع إلا إنهم مشتركين فى مجموعة صفات مميزة والصفات دى بترسم صفات الزعيم الشعبى الحقيقى وبتضمن بقاءه وحب الناس ليه.