زمان كان الحب و«الصدق» و«الإخلاص» و«الوفاء» عادات وتقاليد جيدة جداً فى كل بيت، وفى كل حارة وفى كل شارع كان الجار يقابل جاره بالابتسامة والمودة والمحبة، زمان كان الصديق وفيا لصديقه بدون أى مصالح شخصية، زمان كان فى رحمة فى قلوبنا أكثر وأكثر من الأيام التى نعيشها الآن.
أما الآن بعض هذه الأساليب تغيرت وبقى الحب مزيف والصدق بقى كذب، والإخلاص بقى خيانة وضحكة صفراء على الوجه للأسف الشديد، والجار يصبح على جاره بالصدفة، والصديق يخون صديقه ويعرف صديقه علشان مصلحة شخصية وبعد ما المصلحة تخلص ولا كأننا أصدقاء.. طيب إيه اللى وصلنا إلى هذه السلبيات ؟ إيه اللى خلى أخلاقنا اتغيرت ووصلت إلى هذه الدرجة ؟، هل بقينا فى زمن «المصالح» فقط؟!، ليه ما بقناش نخاف على بعض ونقف جنب بعض أكثر وأكثر والكتف يبقى فى الكتف زى أيام الزمن الجميل؟! ليه بقينا نحقد على بعض ونحسد بعض ومنفرحش لبعض؟! ليه كل شخص بقى بيحب نفسه فقط ولا يحب الخير للغير ليه وليه وليه ؟!
