"حكاية وطن.. بين الرؤية والإنجاز".. الرئيس السيسي: عاوز الناس تنسى ثقافة الخوف على الوحدات السكنية.. والبلد تتغير من الواقع اللى موجودة فيه لواقع تانى خالص.. الرئيس للمصريين: عاوزين دولة.. ولا عاوزين أى حاجة؟

الرئيس السيسي: موشيه دايان قال مصر لن تقوم بعد ضربة 1967 إلا بعد 50 سنة.. وأنا كنت زعلان على بلدي

الرئيس السيسى: السكة الحديد ومترو الأنفاق أرصدة وأصول مصر

الرئيس السيسى: البلد تتغير من الواقع اللى موجودة فيه لواقع تانى خالص

الرئيس السيسى: ميناء إسكندرية من أكثر الموانئ كفاءة فى المنطقة بعد افتتاح محطة تحيا مصر

الرئيس السيسي: الخوف على فقدان وحدات القانون القديم عقبة أمام استغلال 2 مليون وحدة

قال الرئيس عبد الفتاح السيسي، خلال جلسة "المشروعات القومية والبنية التحتية " ضمن فعاليات مؤتمر "حكاية وطن.. بين الرؤية والإنجاز"، إن وزير الدفاع الإسرائيلي خلال حرب أكتوبر موشيه دايان، قال في عام 1967 إن الضربة التي تلقتها مصر لن يقوم منها الجيش المصري إلا بعد 50 سنة، "أنا كنت زعلان جدا على بلدي وقلت معقول عقبال ما نستعيد عافيتنا ناخد 50 سنة؟.. معقول كنت بتفكر كده وأنت عندك 13 سنة؟".

ووجه الرئيس عبدالفتاح السيسي، الشكر للدكتور عاصم الجزار وزير الإسكان، والفريق كامل الوزير وزير النقل، على استعراض جهود وزارتيهما خلال الـ 9 سنوات الماضية، قائلا: "بشكركما طبعا".

وأضاف الرئيس السيسي خلال مؤتمر حكاية وطن بين الرؤية والإنجاز: "عاوز أقول إن كل كلمة قالها الدكتور عاصم والفريق كامل في كل نقطة اتعرضت أو ما اتعرضتش كان محل جهد وإرادة أن البلد دي تتغير من الواقع اللى موجودة فيه لواقع تاني خالص، واتصور أن كل وزير كان معني بشغله لكن دولة رئيس الوزراء كان موجود معانا، وأكثر شخصية تحملت ضغوط هائلة لأن الوزير المختص بيجي يعرض حاجته وخلاص، يكمل شغله، ويحضر اجتماع مجلس الوزراء، لكن الدكتور مصطفى كل يوم معانا ومش بجامل حد أبدا.. واوعوا تفتكروا الفترة لما كان فيها وزير الإسكان ورئيس الوزراء كانت فترة هينة.

قال الرئيس عبد الفتاح السيسي، خلال كلمته بمؤتمر حكاية وطن، إن الرقم الذى طرح من رئيس الوزراء 10 تريليونات جنيه على الأسعار الحالية، 300 مليار دولار على الأسعار قبل كده 600 مليار دولار.

وأضاف الرئيس السيسي: "من سنة ونصف كان في كأس العالم في قطر والإعلام هاجم انفاق 300 مليار دولار من دولة، الإعلام بيهاجم وبيقول ضيعتوا 300 مليار دولار، قولتلهم زعلانيين ليه ده الرقم اللى يتصرف على دولة إنها تجهز نفسها مش للكأس لكن علشان تبقى دولة تتقدم، ووقتها العلاقات لم تكن كما هي الآن لكن الوعى والفهم والصدق هو الأهم ".

وتابع الرئيس السيسي: إحنا صرفنا 10 تريليونات فقط لأنها شركات مصرية لو أنها أجنبية كانت هتبقى 30 تريليونا لكن من كرم ربنا إنها بشركات مصرية بالكامل.

وقال الرئيس عبد الفتاح السيسي: إن الدولة حاجة تانية غير الكلام في كل كلمة كامل الوزير قالها كان موضوع نقاش وضغط وكان يجيب الدكتور مصطفى ويضغطوا عليا علشان الفلوس وكامل ما تعرفهوش عاوز يخلص حاجته وانا معاه لكن منين.

وأضاف: بالمناسبة يا دكتور عاصم ما ينفعش نقدم طلب للحصول على وحدة ونقدم وعود لا نبنى، موضوع الوحدات اللى شغالة عاوز الناس تنسى ثقافة الخوف على الوحدة السكنية اللى ممكن تديها لحد وهتفضل الفكرة دى غير قابلة للنجاح ونشكل ثقافة خلال السنين اللى فاتت المحامين والقضا تقف دائما عقبة عن الإحساس الشديد لصاحب الشقة أو البيت، وكان بيفضل لا يبعها ويقفلها او ياخد إيجار 500 جنيه.

وقال الرئيس عبد الفتاح السيسي، إنه تحدث مع مجلس القضاء الأعلى صباح اليوم عن سهولة هدم الدول، مبينا: "أنا كنت بكلم السادة مجلس القضاء الأعلى الصبح وقلتهم تخيلوا ممكن أهد مصر بـ2 مليار جنيه، وهما استغربوا جدا، قلتلهم أدي باكتة و20 جنيه وشريط ترامادول لـ100 ألف إنسان ظروفه صعبة، أنزله يعمل حالة".

أضاف الرئيس السيسي، خلال جلسة "المشروعات القومية والبنية التحتية " ضمن فعاليات مؤتمر "حكاية وطن.. بين الرؤية والإنجاز": "أهد بلد فيها 100 مليون أو 105 مليون بمليار جنيه، يعني 30 مليون دولار، فيه ناس بتصرفهم في حفلة! يبقى لما أجي أدفع 85 مليار للأسرة اللي هيا مش حاسة إنها عايشه والناس مرميه في الصفيح في الشوارع وفي المقابر، فحد يقولك البلد اللي مش لاقيه تاكل تفرشلهم الشقة كمان؟ طبعا، إذا كنا بنفهم كلنا يعني إيه أمن قومي مش هتستكتروا اللي إحنا بنعمله ده وأكتر منه.. إحنا تعبانين كده ومش معانا نعمل كده؟ أيوه، علشان مايبقاش عندك ثغرة يتم استخدامها في نظم الحرب الحديثة في هدم الدول".

وأكمل الرئيس السيسي: "ماحدش هيهاجمك كتير من بره بشكل مباشر لأن ده تبعاته ضخمة جدا ومكلفة جدا مش بس عسكريا وماليا حتى من منظور القانون الدولي والنظام العالمي الموجود، الناس نازله تتظاهر وأنا بمليار جنيه أنزلهم 10 أسابيع ورا بعض زي ما نزلوهم".

تطرق الرئيس عبدالفتاح السيسي، عن التشغيل الاقتصادي قطاع النقل قائلا: "النقطة دي محل نقاش وخوف من المسؤولين والحكومة طيب فرحانين انكم افتتحتوها وجميلة ولا المهم تبقا جميلة؟ علشان تفضل جميلة يبقا التشغل يكون اقتصادي ..طيب الكلام ده تقولى وانت فيه انتخابات؟ انتوا عاوزين دولة ولا عاوزين اى حاجة ..هنضحك على بعض؟ ..عاوزين دولة علشان التريليون اللى اتصرفوا في قطاع السكة الحديد يجيب تريليون ولا 10 لا .. لو قلت لمستثمر تعالى وخش وخد القطار الكهربائى السريع اتكلف 25 مليار دولار هيقولي طيب التسعير هقوله لا منقدرش .. طيب خليه عندك بقا طيب أنت ملتزم تشغله وتعمله إحلال وصناعة وتدفع القرض حد يقولي طيب متعملوش طيب الموانئ متعملهاش طيب المناطق اللوجيستية منعملهاش.

أضاف الرئيس السيسي: "طيب عاوزين تبقوا بلد ازاى؟ .. عاوزين تاخده مكانكم على الخريطة ازاى؟ .. طيب الكلام ده بقوله علشان تعرف الدولة بتتعمل ازاى؟ طيب فيه أمثلة موجودة؟..عديت على دول افريقية كتير وشفتها ماكنت ماشية ازاى بسالهم بتقدموا دعم ازاى ووزير الخارجية يجيب تقارير يقدمها للناس ..وبسالهم بتقدموا دعم يقولي لا .. كهرباء لا .. بترول لا اكل يقولي لا طيب حاجة للزراعة بيقولي يمكن حاجة للاسمدة. بسال علشان اتعلم .. علشان اشوف بلدي هي كده ليه؟ علشان واحنا بنتكلم هنا معانا افاضل الناس .. مفكرين ومثقفين ومهتمين الشأن العام في مصر..اتكلمت في الموضوع ده قبل كده بشاركم الحوار وبتكلم .. الدولة حاجة تانية غير الكلام.

ووجه الرئيس عبدالفتاح السيسي، حديثه إلى الشعب المصرى، قائلا: يا مصريين السكة الحديد ومترو الانفاق دي أرصدة مصر وأصول .. لما تيجي تتكلم عن أصول بـ 300 مليار جنيه لكن لو أنت اختزلت العلاقة بتاع الأصل بأنك تخفض سعر التذكرة يبقا أنت بتضيع الأصل.. بقولكم علشان الناس تفهم".

أضاف الرئيس السيسي خلال مؤتمر حكاية وطن بين الرؤية والإنجاز،: لو جيت أنا كمستثمر اجنبي ياخد المترو يشغله ويكسب منه مش هياخده منك.. طيب أنت مكلفه 100 مليار، طيب الناس لازم تعرف كلها جاي قرض يعني سلف.. والحكاية لما كنا بنتكلم في الموضوع ده هو بياخد الجانب الجميل اللى هو نخلى التذكرة ما تغلاش، وأنا ببص على التجربة لما كانت الفكرة كده في الخمسين سنة اللى فاتوا كان مترو حلوان، طلبت مني يا كامل 25 مليار جنيه علشان نرفع كفاءته، قلتلك يا كامل يعني أنت جاي دلوقتي والمترو ما بيجبش تكاليف تشغيله مش تكاليف الأصل أو إحلاله أو إصلاحه.. أنت جاي عاوز تغير العربيات ده 25 مليار ساعتها .. لو النهارده يبقا بنتكلم عن 50 أو 60 مليارا.

وتابع الرئيس عبدالفتاح السيسي، خلال مؤتمر حكاية وطن بين الرؤية والإنجاز، أنه في 2023 أصبح ميناء إسكندرية عقب افتتاح محطة "تحيا مصر" من أكثر الموانئ كفاءة في المنطقة.

وعلق الرئيس عبد الفتاح السيسى على قانون الإيجار القديم قائلا: ما لم يكون هناك قانون قوى حاسم سريع للموضوع ده هنفقد الـ2 مليون وحدة والتى تقدر بتريليون جنيه، هذه الوحدات ايجاراتها ليست كالوحدات الجديدة، لأن فرصتها أريح للناس القريبين منها.

وتابع: لماذا لا يتم مناقشة هذه النقطة بشكل جيد، يجى النقاش في تنظيم العلاقة بين المالك والمستأجر في قانون الإيجارات القديمة يقولك دى مكتسبات أوعى تقرب.. يا حبيبى انت بتتكلم الناس اللى عملت المكتسبات دى الله يرحمهم ماتوا من زمان واللى موجود دلوقتى أحفادهم، طيب هما بيشكلوا ايه في الكتلة السكنية التي نفذ بها القانون إذن انت بتتكلم عن كلتلة سكانية سنة 1962، واللى كانوا موجودين ساعتها واستفادوا من العلاقة دى والعقد اللى تم.. طيب هو يبقى مدى الحياة ولا الموضوع ينتهى بقى، أنا بشوف المناقشات في الجرائد وبقراه.. الناس ماتت واللى بعدهم ماتوا وانت لسه ماسك في الموضوع.

وأضاف، حد يجيب أي مناقشة للموضوع ده في البرلمان أو على القنوات الحوارية اللي انت عملته شكل عقبة حقيقية أمام استغلال 2 مليون ثمنهم تريليون جنيه ، حرام علينا نفقد القيمة دي ويدهم الدكتور عاصم علشان يفضلوا مقفولين الكلام النظري فيها والواقع حاجة تانية الدولة حاجة تانية والناس، حبيبت اقولكم ان في موضوعات كتيرة الكلام النظرى فيها كتير والواقع حاجة تانية ، الدولة حاجة تانية ، مشيرا إلى أنه  في سنة 67 وزير الدفاع الإسرائيلي قال الضربة دى لن يقوم منها الجيش المصرى إلا بعد 50 سنة ، انا قولت معقول على ما نقدر نستعيد عافيتنا نقعد 50 سنة معقول كنت بتفكر كده يا كامل وانت عندك 13 سنة تبكى علشان بلدك.