أسرار وحكايات مثيرة كشفتها النجمة روبى حول حياتها الشخصية ومسيرتها الفنية، وتحدثت خلال لقائها ببرنامج "معكم" للإعلامية منى الشاذلى عن بدايتها، قائلة: "دخلت مجال الفن وأنا فى ثانوية عامة موديل إعلانات عشان أجيب فلوس آخد دروس وأشترى لبس، لكن لقيت نفسى فى أفلام وسينما وفجأة اتشهرت".
قالت: "اسمى الحقيقى رانيا حسين وفى البيت بينادونى بيه"، موضحة أن المخرج الراحل يوسف شاهين هو الذى اختار لها اسمها الفنى روبى أثناء مشاركتها معه فى فيلم "سكوت ح نصور"، وأضافت: "قال لى مش هايبقى اسمك رانيا وهاسميكى سحر فقلت له نعم لأ مش عوزاه وبعد كده قال لى على اسم روبى وعجبنى إنه سهل النطق وله معنى".
وتحدثت عن والدتها وقالت إنها ظلمتها: "بعد ما الوالد مات مكنتش عايزاها ترتبط، اترملت وهى عندها 34 سنة، وندمانة عشان مخليتهاش ترتبط لأنى ظلمتها".
وروت حكاية غريبة أيضًا: "جدى كان صعيدى وليه ثأر لازم ياخده كان نفسه يخلف ولد بس ربنا رزقه بـ7 بنات".
وتحدثت روبى خلال الحلقة عن أزمتها التى تعرضت لها بعد نجاحها فى الغناء، قائلة: "إثارة الجدل اللى حصلت وقت ما عملت الأغانى اللى كانت المفروض جريئة، لأن وقتها كنت عاملة الأغنيتين وأنا مبسوطة وبرقص أكنى برقص فى بيتنا، وفى يوم وليلة حياتى اتقلبت".
وتابعت روبى: "ردود فعل المصريين خضتنى ووقفت واتكلمت مع نفسى، لأن مثلا كنت بحب ولد وسيبنا بعض عشان الأغانى بتاعتى ومكنتش مستحملة ردود فعل الناس، وحتى خالاتى قاطعونى وقاطعوا والدتى، وقعدت مع نفسى لأنى مكنتش مدركة ووقفت وقفة مع نفسى".
