كأى أسرة استقبلت طفلها الأول بكل حب وفرحة ولم يخطر ببالهم أن طفلهم يعانى من مشكلة صحية قد تؤثر على حياته، فبعد مرور 7 شهور من ولادته اكتشفت الأم أن طفلها يعانى من مشكلة صحية، فكان نموه غريبا لا يتحرك أو يتفاعل مثل باقى الأطفال في عمره، وهنا اكتشفت الأم أن طفلها مصاب بـ الشلل الدماغى، ولكن كان للقدر رأى آخر فكان مرضه هو السبب في حصوله على بطولة الجمهورية في السباحة.
سمير هشام واحد من أطفال الشلل الدماغى الأبطال، فرغم إصابته بالمرض لكنه استطاع أن يحصل على بطولة الجمهورية في السباحة والبوتشى، كما أنه موهوب في الشعر والغناء، وقالت والدة الطفل سمير هشام لـ اليوم السابع" الشلل الدماغى أثر على حركته والانتباه نسبة بسيطة بس الحمد لله عمل عمليات تطويل أوتار وجلسات علاج طبيعى وظائفى من أول يوم عرفت فيه وانا مش سيباه".
وأضافت" كنت بشيله حتى تم 8 سنين وكان ده طبعا بيأثر عليه عشان نظرات المجتمع، لكنى كنت بشجعه وبدعمه لغاية ما الحمد لله بقي يمشى علي رجليه من تانى ، بدأنا نتجه للعلاج المائى وتدريبات السباحة بس عمرى ما كنت أتخيل أن سمير هيبقى بطل في يوم من الأيام، وفعلا الحمد لله سمير دلوقتى واخد بطولة وواخد أكثر من 13 ميدالية ذهبية وبرونزية وفضية.
وتابعت"هشام الحمد لله عنده اخواته ماليين عليه حياته وبيدعموه وهو كمان بيحبهم وبيخاف عليهم، دلوقتى بعد ما بقى يمشى نفسيته بقت أحسن من الأول وخصوصا لما بياخد ميداليات والكابتن بتاعه بيدعمه وبيشجعه وهو في فريق كله من ذوى القدرات بس اعاقات مختلفة"توحد، دوان، إعاقة حركية وبصرية وذهنية"، كلهم بيدعموا بعض وبيشجعوا بعض ".
