السلام عليكم
أنا هاشم.. دكتور صيدلى
"يوميات صيدلى فى الأرياف" ده عنوان الحلقات اللى أنا حابب تعرفوا عن مهنتى من خلالها وحابب كمان أوصل لكم أد إيه الصيدلى تِعب وبيتعب فى شغله وحابب كمان أقول "إن الصيدلى مش بياع" "هه الصيدلى مش بياع" ركزوا
ياللا نبتدى على بركة الله
النهاردة يا جماعة أول يوم ليا فى الصيدلية بتاعتى فى بلد اسمها "كفر سندوس البهواية".
ما تحاولوش تدورا عليها على الخريطة لأنها مش موجودة وكمان الأخ جووجل نفسه ما يعرفش عنها أى حاجة .
ليه بقا أنا اخدت الصيدلية هنا؟
أقوللكو
أنا اخدت الصيدلية هنا علشان أنا مش عارف آخد صيدلية فى المدينة علشان طبعا السعر العالى وكمان مفيش أماكن أعرف أعمل فيها صيدليتى.
أنا قلت ابدأ فى مكان صغير وبعدين أروح براحتى المدينة ومعايا الفلوس اللى أقدر أشغلها فى الصيدلية الكبيرة بقا.
مشيت فى موضوع الورق ده وخلصته بس بعد ما طلع عينى ..إمضاءات ومشاوير ورشا فصدى إكراميات .. لا بلاش.
ده كل حاجة كانت سهلة خالص ... خالص خااالص .. لايكون فيه ميكروفونات و لا حاجة .. خلينا ماشيين جنب الحيطة.
المهم فى الآخر الحمد لله أنا هنا فى صيدليتى فى وسط الأدوية والمحاليل والحاجات اللى اتعلمتها فى الكلية.
أيوا بقا
الواحد كدة حس إن حياته العملية بدأت
ونفس المجال اللى اتعلمته
إمتا بقا ييجى أول زبون .... قصدى أول عيان
زبون إيه بس يا هاشم ؟؟ اسمه مريض يا بابا
ولا إمتا بقا تيجى أول روشتة ؟
ح احكيلكو بقا عن أول زبون
بس بقا فى الحلقة الجاية إن شاء الله .. دمتم بخير
سلامو عليكو
