تقول نورا إدوار المستشار الإعلامى للمعهد المسكونى: «شهر رمضان بيكون فيه عزومات مع أصدقائى المسلمين وبنتبادل الفطار بينى وبينهم وأولادى بيعزموا أصحابهم مسلمين ومسيحين وبيتفقوا كل مرة عند حد نفطر ونتسحر فين على الأقل مرتين فى الأسبوع».
وتابعت «إدوار» في تصريحات خاصة لـ«اليوم السابع»: «بنستنى فى رمضان مشاهدة المسلسلات وبنحب التجمع مع كل أصدقائى مسلمين ومسيحين وبنتسابق مع بعض مين بيعمل كنافة أحلى من التانية أو قطايف ومن الحاجات اللى بحبها الخيم الرمضانية وقاعدة الحسين وبيكون فيه زيارات للحسين من بعد الفطار لحد السحور».
وأضافت: «في كل سنة قبل رمضان لازم أجيب فوانيس في البيت وفى الشغل لحد دلوقتى وبنعلق زينة وبنجيب فوانيس والشركة اللى شغالة فيها بتوزع فوانيس على الموظفين مسلمين ومسيحين فوانيس خشب وعندنا فى المنطقة بنعلق زينة فى الشارع قدام بيوتنا وبعلق فانوس في البلكونة وكل واحد بيعمل قدام بيته وفيه أصدقائى لازم أروح وأفطر معاهم والسحور بيكون أساسى ومن تانى أسبوع ولازم يكونوا أكتر من يوم بيكون فيه عندى عزايم كتير».
وروت موقف حدث مع أولادها قائلة: «مرة كان فيه درس لأولادى كان عندى في البيت ومعملناش أكل ولا شرب غير بعد أذان المغرب وأكلنا كلنا مع بعض والقصص دى كتير».
وحول أبرز المواقف التي حدثت معها فترة الجامعة قالت: «كنت بكون قاعدة صايمة طول اليوم أيام الجامعة ومش أفطر غير على أذان المغرب مع أصحابى المسلمين وكنت دايما بحب أراعى مشاعر أصدقائى وبعلم أولادى ده كمان وفى عيد الأضحى أصدقائى بيبعتوا ليا اللحمة كمان».
