أعلنت الإعلامية رشا الجمال – ابنة الإعلامية الراحلة سامية الإتربى ـ تقديم برنامج "حكاوى القهاوى" على قناة الحياة خلال شهر رمضان هذا العام، حيث يعد من أبرز برامج والدتها الراحلة، وارتبط في أذهان الملايين من المصريين بحلول شهر رمضان، وحقق البرنامج شهرة كبيرة أعواماً عدة متتالية، واعتُبر من أهم برامج التلفزيون المصري سنوات طويلة.
وطرحت قناة الحياة البرومو الخاص بالبرنامج الذى يذاع خلال شهر رمضان.
وروت رشا الجمال قصتها مع تقديم برنامج والدتها من خلال منشور على صفحتها بموقع فيس بوك وكتبت:"كان زمان بعد ما ابتديت أكون مذيعة اتعرض عليا كذا مرة إني أعمل حاجة شبه برنامج حكاوي القهاوي بتاع أمي الله يرحمها وأنا رفضت، كنت ساعتها حاسة إنه إفلاس، ما القديم موجود وجميل جداً، نعمل واحد جديد ليه؟ مفيش مواضيع جديدة؟ هل أنا مذيعة فاضية ودي الطريقة الوحيدة للنجاح؟ وقتها شعرت إن ده type casting ورفضت: "لن أعيش في جلابية أمي" الله يرحمه نور الشريف.
واستطردت رشا الجمال :"لكن الفكرة المخيفة: هل لنا أن نتطاول على الزمن؟ هل الناس هتحبنا زي ما حبوهم. أمي و يحيي تادرس وعمر أنور وعمر زهران والناس اللي اتربيت اسمع قصصهم، ما هنرييت سكاكيني ماتت، و بتاع الزراير اللي في عمارة Tiring مات، و بتاع البيانولا مات وزمان البنت منصورة اللي طلعت في التتر ماسكة حنش في أبو رواش بقت جدة.. وبعدين فكرت أمي كانت تعشق شغلها وناسها ودنيتها، وبابي كان يقعد يتريق عليها: شغلي، عربيتي، جلابيتي، بنزيني، سجايري، قهوتي، أنا مذيعة!.
ولفتت رشا:" مامي كانت هتحب جداً إن دنيتها تمتد من خلال بنتها والناس تفتكرها وتشوف برنامجها الأصلي تاني.. ولو إنها دايماً كانت بتقولي ما أحبش حد يكون أحسن مني إلا ولادي، أحب أخواتي وأصحابي يبقوا زيي، مش أحسن مني، إلا ولادي، مع إنها كانت بتقول لي كدة، متهيألي كانت هتفرح شوية لما الناس تقول رشا الجمال هايلة، بس سامية الإتربي كانت أحسن بكتير .!
واستكملت رشا حديثها:"أنا راضية ومبسوطة وطايرة بدة، وبالتالي فتحنا صندوق الجلاليب العتيقة بحكاياتها وذكرياتها وهويناها وحطينا عليه حزمة وشنط وهدوم جديدة من رشا باشا ورشينا مية قدام عمارتنا في اسماعيل محمد وأصطبحنا وصبح الملك لله، غنياني ومهنياني حتي من الآخرة يا مامي، فيه ناس بتورث حتة أرض في البلد وناس بتورث شقة إيجار قديم وأنا ورثت الحكاوي".
واختتمت رشا كلامها:"بحبك يا مامي وآسفة اني كنت بجننك لحد ما أقعد أتفرج علي البرنامج وبعدين يعجبني وأكيد كل العيال بما فيهم عيالي، هيعملوا فيه كدة،وكما قالت الوالدة باشا لبنت عمها شمس هانم الإتربي:"التاريخ بيعيد نفسه يا شوشو."، "بخت أمي سلفتهولي، لقيته ناقص، كملتهولي."، رحمة الله عليهم جميعاً. زمانهم متسليين
