السبحة هي الوسيلة التي يلجأ لها الكثيرون للتسبيح وذكر الله ومع الوقت أصبح خاتم التسبيح وسيلة أخرى يستخدمها البعض، ولكن كان لعم خالد رأى آخر في التسبيح فقرر أن يكتب اسم الله يوميا على الورق، فبدأ بـ 100 مرة ثم ألف حتى وصل لـ 13 مليون مرة، فمنذ أن تطأ قدميك منزله البسيط ترى أورقا مكتوب عليها اسم الله ومغلفة بدوسيهات بلاستيكية مبهجة.
خالد حزين يبلغ من العمر 57 عاما وهو من أبناء محافظة الشرقية مركز فاقوس، كانت حياته عادية مثل أي شاب ولكن كانت ظروفه صعبة فلم يستطيع الزواج في بداية حياته ولم يكن له وظيفه معينة، ولكن في لحظة تغيرت أحواله وبدأ من جديد وهو عمره 45 عاما.
وعن سر تغيير حياته وسر كتابة اسم الله 13 مليون مرة قال عم خالد لـ اليوم السابع"، "أنا كنت شاب طايش ومش مركز في حياتى ومبعملش أي حاجة أصلا بس عمرى ما كنت أسيب التسبيح، أنا بحب اسم "الله" جدا فقررت أنى بدل ما أذكره فقط باللسان قلت هكتبه وفعلا جبت كشكول وكتبت 100 مرة اسم الله حسيت بمتعة وبهجة رهيبة وروحت مكمل لـ 1000 و2000 لغاية ما وصلت دلوقتى 13 مليون كلمة الله وبقالى 8 سنين بكتب فيها، وناوى أكتب كمان 50 مليون مرة.
وأضاف" كلمة الله وأى ورقة فيها ذكر الله مبيحصلهاش حاجة، وفي مرة البيت عندى ولع وسبحان الله كل حاجة اتحرقت حتى الدوسيهات البلاسيتك اللى كان فيها الورق اللى مكتوب فيه ذكر الله ولكن الورق نفسه متحرقش عشان مكتوب فيه الله، حتى المطر بينزل عليا في البيت لكن الورق مبيحصلوش حاجة".
وتابع "لما كتبت اسم الله حسيت بسعادة رهيبة وبعدها ربنا فتح عليا، اتجوزت وأنا 45 سنة ومن شابة صغيرة وربنا رزقنى بولدين من عنده، وكمان اتوظفت وأنا في السن ده، وده طبعا حاجة غالبا مبتحصلش، فالحمد لله أقدار ربنا مرتبة كل حاجة وربنا عارف أد إيه أنا بحبه عشان كدا كان بيراضينى ولغاية دلوقتى بيراضينى".
تم أضافة تعليقك سوف يظهر بعد المراجعة