أصبحت الفنانة الكوميدية إيمان السيد، حديث منصات السوشيال ميديا، خلال الساعات الماضية، بعد تدوينة لها عبر فيس بوك عبرت فيها عن انزعاجها من تعليقات تتلقاها حول تأخرها فى الزواج حتى الآن.
وكتبت: "أنا بتضايق لما حد يكلمنى فى موضوع الجواز ويقعد يقول معلش وكل شىء قسمة ونصيب وكله بأوانه والـ 24 قيراط لأن ببساطة ده اختيارى".
أضافت: "يعنى تخيل مثلاً لو أنا عرفت إنك شخص نباتى، وفجأة قعدت أقول لك: لا إله إلا الله ماتزعلش كل شىء نصيب ومين عارف يمكن بكرة شايل لك تلاتة كيلو بوفتيك..أظن مش منطقى".
إيمان السيد من مواليد أبريل 1980، تخرجت فى كلية حقوق جامعة عين شمس، وحاولت العمل بالمحاماة، ولكنها لم تجد نفسها فى هذا المجال، وقالت: "أنا مش وش أقسام ولذلك ابتعدت عن المحاماة".
إيمان السيد، برعت فى عدد من الأدوار الكوميدية ومن أبرز أعمالها "لهفة" "ونحب تانى ليه"، وقد شبهت بالفنانة زينات صدقي منذ بداية ظهورها.
إيمان سبق أن تحدثت عن الزواج، وقالت إنه ليس هدفها فى الحياة، وأضافت: "معنديش مشكلة فى الوقت، ووقت ما أحس إنى مؤهلة وإن ده البنى آدم اللى هكمل معاه حياتى هتجوز".
