علق الإعلامى عمرو أديب، على الزيارة التفقدية لوزير النقل المهندس كامل الوزير، بمحطة مصر بالإسكندرية، وإحالته لناظر المحطة للتحقيق بالإضافة لعدد من المسؤولين بالإسكندرية.
وأضاف خلال برنامج "الحكاية" الذى يذاع على قناة "mbc": "هو إحنا لازم نبقى قاعدين على إيدين بعض، ويجى الناس تقول الوزير بيعمل ويسوى، الوزير دخل المحطة ملقاش حد شغال، لو مش عاوزين تشتغلوا فى آلاف الشباب نفسها فى فرصة وعاوزة تشتغل".
وقال: "الناس تقول الحاج بقاله 25 سنة فى الخدمة، طب ما خلاص فى شباب صغير نفسه يدير، الوزير من يومين قالهم هبعت أجيب أجانب من برة، وأنا فاكر من كام سنة لم قلت هذا الكلام الدنيا اتقلبت، لا ده أنت تعمل إعلان وتطلب مدير أو ناظر محطة بالمرتب الفولاني".
وتابع: "الوزير قالهم ناظر المحطة مسؤول عن جداول التشغيل والنظافة، الكلام ده خدناه فى ابتدائى، ميس جانيت قالتلى المعلومة دى وأنا فى ابتدائى، ناظر المحطة مسؤول عن نظافة المحطة، الناس عاوزين إجازات ويسألوا كام يوم إجازة، طب والبلد؟ هل إحنا محتاجين وزير لكل مواطن؟ ده الوزير بينزل يشتغل بإيده، وفى وزراء تانيين بيعملوا كدة".
وتساءل عمرو أديب: "هل هذا صحيح؟ أنا دخلت الجيش، مكنتش بشوف لواء، واللى كان بيحركنى فى المعسكر كان أومباشى، وكان يمشى يحرك المعسكر على رجل، الله يكون فى عون الوزير، ومن يوم ما استلم وأنا قولت ربنا معاه، محدش بياخد التركة دى وبيقدر عليها، لأن الموظف المصرى الفاسد بيوقف المراكب السايرة". وقال: "محتاجين ثورة فى الإدارة، إحنا عاوزين مدير جيد".
