حياة مليئة بالدماء مبدأهم "افتراس بلا رحمة ولا شفقة"، فكهم فتاك ورائحتهم كريهة، لا تستطيع التمييز بين الذكر والأنثى، ولكن فى عالمهم الأنثى هى المسيطرة ويمكنها قتل الذكر إذا حاول الاقتراب منها دون موافقتها، تأكل الفريسة بعظامها وجلدها وحتى أسنانها دون تمييز، وفى حلقتنا اليوم من برنامج فتحى شو نتحدث عن حيوان الضبع تقديم محمد فتحى عبد الغفار.
ويقول رجل الضباع الأقوى في مصر، صلاح طلبة، وهو مربى ضباع: "الضبع حيوان بيأكل الجيفة وغير مسيطر على الأنثى بل هي من تسيطر وميقدرش يقرب منها دون موافقتها، لأنه من الممكن أنها تقطع دماغه بعضتين من أسنانها، وبيأكل من غير تمييز أى حاجة حتى لو ميته من أسابيع بيأكلها عادى، غير الأسد مبيأكلش من رأس الحمار إلا اللحمة بس واللى بيفيض من الأسد بأخده من قدامه وبرميه للضباع تأكلها".
وتابع: "الضباع عندها أنياب قوية جدا بسمع صوتهم وهما بيأكلوا العضم وقرقشته من مسافة كبيرة، ولما باجى الصبح مبلاقيش حاجة من رأس الحمام ولا حتى سنانه، ومحدش بيعرف يميز بين الذكر والأنثى إلا أثناء الحمل والأنثى هي المسيطرة".
وأردف: "لما بحطلهم الأكل بيزغرطوا، والضبع أنت أمن في بيته لو دخلتله وبيسيبك تكتفه وتصطاده لو دخلت بيته ولما بيخرج ويكتشف أنه اتكتف بيتحول لمفترس ويفضل يصوت كأنه بيقولك أنت عملت ازاى كده، بيمسك الفريسة في البرية ويفترسها وهى حية".
واستكمل: "حمل الضبع عزيز كل 5 أو 6 سنين تولد بطن والبطن الواحدة بتجيب واحد أو اتنين، والضباع أنواع المنقط والمخطط والأقوى المنقط اللى هو بيعيش في مصر وليبيا والسودان، أقوى فك في العالم هو الضبع وعنده غدة قوية في معدته بتفرز عصارة قادرة على هضم العظام والسنان والجلد عنده أقوى معدة في العالم".
