محمد صلاح عودنا من أول يوم وضع فيه قدمه في أوروبا أنه ليس هناك سقف لطموحاتنا.. من أول جرأته في بازل ومرواحه للمرمى بسهولة وسرعة غريبة، وده اللي لفت أنظار مورينيو وضمه بالفعل لتشيلسي، ولما اتسأل عنه بعد ما انفجر في ليفربول قالهم اسألوهم مشوه ليه، أنا اللي ضمتيه والأيام أثبتت إني صح!
النهاردة محمد صلاح تقريبًا كان بيدافع لوحده عن حلم الملايين من جماهير ليفربول في إن الفريق يسترد صدارة الدوري، وكان تقريبا بيكافح عشان يوقف فريق جوارديولا، ومن غير أي مقدمات صنع الأول لماني من كرة ميتة وعادية في نص الملعب، وسجل الثاني من كورة ما يتقالش عليها فرصة أصلا، نتيجة التطور الكبير اللي حصل في مستوى وطريقة تعامل صلاح مع المباريات وخاصة الكبيرة.
ليفربول سدد 6 مرات على إيدرسون، منها 3 لمحمد صلاح، أكتر واحد راوغ في ليفربول كان كيرتس جونز بمراوغة واحدة، صلاح عمل 5 مراوغات، أكتر واحد في ليفربول عمل تاكلنج كان ماتيب وهندرسون بـ3 مرات، صلاح عمل 4!!
52% كانت نسبة المئوية لمحاولات ليفربول الهجومية من الناحية اليمين اللي مكتوبة باسم صلاح، أكتر من أي جبهة سواء في ليفربول أو مانشستر سيتي.
بعيدًا عن ماتش النهاردة، محمد صلاح دلوقتي هو هداف الدوري الإنجليزي مع فاردي بـ6 أهداف، لعب 9 ماتشات الموسم ده سجل فيهم 9 أهداف، على بعد هدف من معادلة إجمالي أهداف دروجبا في الدوري الإنجليزي (104 أهداف).
الأفضل في ليفربول حاليًأ هو محمد صلاح بلا أدنى شك، الأفضل في الدوري الإنجليزي منذ موسم 2017/2018 حتى الآن هو محمد صلاح بلا منازع، حتى مع وجود هاري كين ودي بروين وبرونو فيرنانديز وعودة لوكاكو ورونالدو، وتجديد عقده هو أهم ملف بالنسبة للإدارة والجماهير حاليًا وتوقيع عقد جديد بأعلى مرتب في تاريخ النادي مسألة وقت، ومستحقة مليون%.
بداية موسم بتفكرنا باللي حصل في 2017/2018 لكن وقتها ناس كتير قالت إنه لاعب الموسم الواحد ومحدش كان مصدق إن صلاح ممكن يوصل لأبعد من كدة، لكن السنة دي الوضع مختلف تماما، مع ابتعاد رونالدو وميسي تقريبا عن الصورة، وتزايد قيمة وأهمية وتأثير محمد صلاح فوزه بجائزة الكرة الذهبية الأولى في مسيرته ومش الأخيرة إن شاء الله والثانية في تاريخ أفريقيا، هيكون أمر طبيعي في نهاية الموسم بشرط استمرار حدة الفرعون.
تم أضافة تعليقك سوف يظهر بعد المراجعة