يستضيف الإعلامى عمرو الليثى أول وثانى أيام العام الجديد كل من المطرب محمود الليثى والعازف محمد عبد السلام، ويتحدثان عن أهم المواقف التي تعرضا لها في مشوارهما الغنائى، كما يتحدث الليثى عن غنائه مع المطرب عبد الباسط حمودة وشيبة، ورأيه في الغناء الشعبى حاليًا، ومن المقرر أن يقدم الليثى عددًا من الأغانى خلال الحلقة منها "صعبان عليا" وغيرها.
وقال المطرب الشعبى محمود الليثى مؤخرًا: "أنا جيبت الراقصة لورديانا في أغنية "قشطة بالزبادى" عشان عجباكوا أنتوا مش عجبانى أنا بس، وكنت عاوزها تطلع معايا بنفس الملابس اللي ظهرت بها في الفيديو عشان الناس تعرفها بسهولة، واللى حصل وقت ما نزل الفيديو اللى في مركز التجميل، ودخلت على "الإنستجرام" الخاص بها كلمتها وقلتلها أنا محمود الليثى، راحت بعتالى رقم مدير أعمالها".
وأضاف خلال استضافته في "تليفزيون اليوم السابع"، مع الكاتب الصحفى عمرو صحصاح والمذيعة شروق وجدى: اتكلمنا فعلاً ومكنش مصدق أنه أنا اللى بكلمه، وقلتله أنا عاوز أعمل أغنية مع لورديانا، وقبل ما يقابلونى عمال أفكر لغاية الساعة 8 الصبح عشان عاوز أغنية أعملها مع لورديانا ومفيش حاجة جاية في بالى، وأنا بدور على مقسوم زى "اخواتى" اللى كانت بترقص عليها، عشان لما تيجى ترقص تطلع نفس الحركات دى للأغنية بتاعتى".
وتابع: المهم جاتلى فكرة أغنية "جدو على" النسخة الأصلية الأجنبية وكلمت إسلام كلامنص وقالى لما أصحى هلاقى كلمات الأغنية وروحت قابلت إسلام ساسو ولورديانا واتصل على إسلام كلامنص لقيت الموبايل مغلق، وكتبت جزءا من الكلام وأنا في الطريق وبعد كده اسلام كملها بقى والأغنية نزلت وكسرت الدنيا.
وعن تعرضه لأزمة مع المصنفات الفنية قال: واجهت مشكلة مع المصنفات الفنية لإنى نزلت الأغنية من غير ما أخد موافقة من المصنفات على الكلام، فحصلى مشكلة والحمد لله اتحلت وخلصت ولكن أنا ملحقتش فعلاً لأنى كنت خايف حد يسبق وينزل حاجة قبلى، ولكن ده غلط طبعًا.
