ننشر قصيدة جديدة لـ الشاعر سيد أبو ليلة بعنوان "أحمس".
بيحسس على قلبه
قبل ما يستغرب موت الأحباب
بيخاف..
متلبس بجريمة..
بيقول إن "ولاد الحرام
بيقعوا من السما
زي الأنبيا الأطفال"
موهوم
مش عارف إن "لو كل من فيها رسول للباقيين..
هانصدع"
وإن مافيش مشهد بيبقّع
توب المكتوب
هانستغرب موت الأحباب
نتفاجئ بصوت عالي
زي عساكر بيطمنوا بعض في الصحرا
"واحد تمام"
واحد تمام
ماعدش بيفرّق بين الحقيقة والمنام
بيتفاجئ زيكو بالظبط
"ده كان هنا"
وسطنا
وبيستخدم كتالوج الوقت
عشان يسطّر ورقة الامتحان
بيقول يا رب.. ويلجأ للأحباب
"لو كنا بس حسينا إنه بيتكلم جد
ومش أتنشن هور ونكدي
كنا..
كنا لحقنا نعمل أبطال دلوقت
كنا حاولنا.. ناخد حتة من حياته ونبيعها"
واحنا بنستغرب موت الأحباب
وبنحسس على قلوبنا
