شيالة الأمل والأنابيب.. أم مروة 40 سنة شقيانة على ولادها الـ 7

ملامحها روت حكايتها دون أن تنطق بكلمة واحدة، فتجاعيد وجهها المحفورة حكت لنا قصة 40 سنة من الشقى والتعب والجرى على أكل العيش، خطواتها تشبه الطفل الذى يحبى ويتعلم المشى على دراجته الصغيرة، ولكن دراجتها هى كانت أكبر بكثير، لأنها كانت تحمل أكثر من 6 أنابيب غاز بأوزان لا تقل عن 100 كيلو فى اليوم، ولكن أم مروة قاومت كل ذلك من أجل أبنائها الـ 7 وعلاجها.

"أقعد أمد إيدى للناس يشحتونى ولا أكل بعرقى وأصرف على علاجى وعيالى"، بهذه الجملة بدأت أم مروة التى تبلغ من العمر 68 عاما كلامها لـ"اليوم السابع".

وقالت: "من وأنا لسة شابة صغيرة جوزى توفى وسابلى 7 عيال أربيهم لوحدى، كانت كل السكك متقفلة فى وشى، أهلى طردونى من البيت عشان مقدروش على مصاريف عيالى وحماتى قالتلى روحى حطى العيال فى ملجأ، لكنى مقدرتش أعمل كل ده، كنت بجيب زيت وسكر وأبيعه للناس وألف على البيوت عشان أكل عيالى وأقدر أعيش".

واستكملت حديثها موضحة: "بعد فترة معرفتش استمر فى الشغلانة دى، لقيت واحدة بنت حلال قالتلى تعالى خدى أنابيب من المخزن على عجلة ولفى بيعيهم فى البيوت وبقيت فعلا بعمل كدا باخد بالـ7 والـ8 أنابيب واشلهم على عجلة وألف بيهم فى الشارع وأنادى اللى عاوز أنابيب ".

وأضافت: "ببيع أنابيب بقالى 40 سنة ورغم أن صحتى تعبتنى ومركبة قسطرة على القلب لكنى بشتغل لحد دلوقتى وأنا عندى 68 سنة عشان أجيب مصاريف علاجى وأصرف على البيت، زمان كنت بشيل بالأنبوبتين والتلاتة لكن دلوقتى مبقتش اقدر بقيت بس بجر العربية وأمشى بيها وأحطها عند البيوت واللى عاوز بخلى واحدة تطلعله الأنبوبة وأديلها 10 جنيه، والحمد لله جبت مثلا 5 أنابيب وخدت فيهم 50 جنيه حلو رضا أحسن ما أمد ايدى وحد يكسر عينى".

"بلاقى الحنية فى الناس الغريبة اللى ماشية فى الطريق مش بلاقيها من عيالى"، هى الجملة التى عبرت عن حال أم مروة، حيث قالت: "عيالى كلهم ظروفهم وحشة ومحدش فيهم شغال أنا اللى بشتغل رغم أنهم متجوزين ومخلفين مفيش غير البنات بس اللى بتشتغل، أنا بدعيلهم بالهدايا ربنا يهديهم ويصلحلهم الحال".

وتابعت: "أنا راضية الحمد لله كفاية دعوات الناس ليا فى الشارع اللى يقولى ربنا يقويكى يا أمى، واللى يقولى ربنا يديكى الصحة وبيبقوا عاوزين يشيلو عنى والله ما فى عيل من عيالى بيعمل كده ولا حتى بيدينى حاجة".

وأنهت حديثها قائلة: "كل اللى بتمناه من الدنيا انى أطلع عمره وأزور النبى عليه الصلاة والسلام، وان ابنى يشتغل أو حتى يكون عنده توكتوك يصرف منه".