تتعرض غزة للقصف مجددا، هى دائما وبلدان فلسطينية أخرى تتعرض للاعتداء، بينما ينام العالم العربى ليلاتى زى ما بينام، على حد قول الشاعر الكبير عبدالرحمن الأبنودى فى ديوانه «الموت على الأسفلت».
ينام العالم العربى/ ليلاتى … زى ما بينام/ بعواجيزه … بفتيانه/ بأطفاله … بشبانه/ قرا الجورنال/ وملا سيارته بالبنزين/ وشاف النشرة بعد الظهر/ وقال فى الانتفاضة كلام/ وحياها/ وبعدين … نام
نزل عمل الشوبنج/ وفات على شركة الفيديو/ وغير شنطة الأفلام/ لبس وقلع لبس وقلع/ وليف نفسه فى الحمام/ وقام للنوم/ يكمل متعته أحلام/ ونام العالم العربى ليلاتى زى ما بينام
وطول الليل/ صحيتوا إنتوا/ ولا بتوا ولا نمتوا/ تلموا الجمر من تحت التراب والثلج/ تضموا الجمر … وتحتّوا/ بدت بحجارة/ وانتهت الحجارة بنار/ بدت أفراد/ بقالها لجان يمين ويسار/ بدت لكن… أهى فلسطين/ بحور الناس موجات موجات/ بتزحف عالعدو بقوة/ كانوا عشرات/ بقوا ميات/ بقوا ألفات/ هتاف واحد بدل هتافات/ بدن واحد بل بدنات/ علم واحد … عليه إشارات/ علم مظلوم/ وجاله يوم/ يرفرف توبه فى السموات/ وله ضحكات/ وله همسات/ وله صيحات/ بيتقدم خطى الزاحفين/ وبينادى: أنا فلسطين/ أنا فلسطين/ أنا فلسطين/ ظلمتونى وأدينى … النضال دينى/ وصوتى ما زال/ ولونى ما زال/ ورقصى ما زال/ فلسطينى/ فلسطينى/ فلسطينى/ ميعادنا فى التاريخ قدام/ ونام العالم العربى/ ليلاتى زى ما بينام
ودى الليلة/ سهرنا نغنى بطولاتكم/ ونشرب كاس فى صحتكم/ وكاس ورا كاس/ فى صحة أحلى وأجدع ناس/ قزازة تؤدى لقزازة/ وحيينا البنات … والصبر/ وحيينا الشباب … والقبر/ فلسطين خضرا جوه الخمر/ أغرودة/ وزغرودة/ وموجودة/ وعلى الخارطة ما هياش سودا/ ما هياش محتلة ولا حاجة/ بتتكلم فلسطينى/ وما فيهاش أى صهيونى/ فيها انتوا بمبانيكم/ بأغانيكم/ بإصراركم وأفكاركم/ وبكباركم وبصغاركم/ شربنا فى صحة الثورة/ فى صحة كل من بيجسد الفكرة/ وقمنا نمنا/ منتظرين نقوم بكرة
فى دى الليلة أنا نايم/ وصاحى عدوى/ يدفن فى الشباب الحى/ ببلدوزرات/ بطيارات/ نزل واحد على سريرى وأنا نايم/ جيت قايم/ وأنا مفزوع/ أحاول أبعد الجثة/ أشيل الدم من الفرشة/ ألم ذراع كان منزوع/ وناشف/ إنما … مرفوع/ بيهتف لسه رغم الموت/ يصحى القصة فى سريرى/ يشيل الحلم من راسى/ لقيت الريق مش مبلوع/ وماليش صوت/ أو بانطق بصوت غيرى/ وقمت … جريت للشارع/ رميت نفسى فى وسط عباد/ وناقشنا حكاية دفنكم أحياء/ وقلنا: يسقط الأعداء/ وهددنا الصهاينة هناك/ بميت قبضة فى وش الجو/ وحييناك … وهاجمنا عدو السو/ لكن لما شعرت بجوع/ أنا حودت عالحاتى/ طلبت كباب/ معاه … بيرة/ أنا أصلى بأحب اللحم … والبيرة/ لقيت قلب الطبق/ مكتوب عليه «بيت لحم»/ وعلى البيرة/ مكتوب «البيرة»/ سكرت … وطفت/ بين الصحيان والوهم/ لقيتنى فى يافا/ وفى حيفا/ وفى نابلس وفى الناصرة/ وفى بيت لحم وفى غزة/ وقشعر جسمى/ ساعة الحزن ليه هزة/ خفت … وقمت/ هربت أوام/ لقيت نفسى فى قلب البيت/ لقيت الفرش من غير دم/ عرفت أنام/ أنام/ والعالم العربى/ سبقنى ونام.
تم أضافة تعليقك سوف يظهر بعد المراجعة