الغربة حيطان بتلم الحزن
وبتدفن فينا الإحساس
وبنبعد عن أغلى مالينا
عن بيت وأصحاب ومكان
عن أقرب أهل وأجمل ناس
وبتسرق مننا أحلامنا
علشان قرشين
محناش عارفين عايشين فيها
ولا بندفن أحلامنا سنين
الغربة بتقتل فينا كتير
وأولادنا بعيد.. ولا نفرح بيهم قدامنا
ولا نحضن فيهم يوم العيد
ملعونة الغربة اللى تخلينا.. نتملى تجاعيد
تجاعيد ف قلوبنا بتتمكن والحزن يزيد
وكانه محيط مليان أوجاع..مليان تنهيد
ومشاعر فينا بتتلخبط....وبنتردد
هنكمل تانى ف غربتنا..
ولا نرجع لمكان بنحبه ومانكونش عبيد
والخوف م الماضى بيرعبنا علشان الجاى
مجهول ده أكيد
وبنفضل نحبس مشاعرنا وبنضحك علشان نستقوى وبندفن دمعنا ف عنينا
علشان قال ايه هنكون أقوى
واللحظه ف غربتنا بتوقف وكأنها سنين
ولا نعرف نضحك ولا نفرح ..
حوالينا مكن مش بنى أدمين
ولا فى إحساس.. علشان مش ناس
ولا أى مشاعر تحضننا
ولا قلب يحس بتنهيدك
ولا واحد يمسح ف دموعك. يمسك ايدك
الغربة سراب...وكمان سرداب
سرداب ألغام بيضيع باقى العمر هدر
وبنفضل ف حيرتنا وتايهين
محناش عارفين ..هل هو نصيب
هل هو قدر
ولا نرجع من تانى وهنسيب
ونقول جوانا بصوت واطي....زى التفكير
العمر ده فيه كام يوم تانى علشان نبعد
عن كل أولادنا وحبايبنا ..والعمر يطير
محناش عارفين ايه اللى جايبنا
بيفوتنا كتير... لما بيكبروا واحنا بنبعد
من أول كلمة بابا حبيبى أما بتتقال
لما يوقع نفسه على الأرض علشان يتشال
لما بياخد منك مصروف.. لما بينطق اسمك بحروف
واما بيتعب لما بتتجن عليه م الخوف
لما بتستنى نجاح منهم
لما بإيدك بتطمنهم
مش عايز تبقى احسن منهم
ملعونة يا غربة ف كل مكان
لما بتدفنى فينا الفرحة
ملعونة العيشة بدون أيام
بالشوك أفراحنا تكون طارحة
