باحبك وانا يا حبيبتى فى شعورى ناحيتك أمينة
واتمنيت أكون معاكِ من قبل حتى ما يوحدك مينا
من قبل ما أحمس يطرد عاديكِ ويدينا
أول درس فى واجباتنا وفى حقوقك علينا
اتمنيت أكون عالهضبة واسمعك بتنادينا
ننزل نبنى ونزرع ونعمر وادينا
واشرب من عسل نيلك أول قطفة فى قنينة
مصنوعة من طمى أرضك ومن ذات الطينة
اللى كبرنا فوقها وعشنا ندوقها
فى طعم زرعك اللى عليه اتربينا
واتمنيت أشوف فرعونك
اللى بشرته من لونك
واللى حمل حجارتك على أول سفينة
علشان ما يبنى منها مجد وحضارة وزينة
أهرامات ومعابد ومسلة وقرية ومدينة
اتمنيت لو ابنى مع زوسر وأمنحتب وامنمحات
واقبل إيدين كل واحد مات
علشان يحرر أراضينا
واشوف المرأة بتقودك حتشبسوت الملكة المتينة
اللى صيتها ذاع فى بونت وفينيقيا مش بس فينا
واعاصر ولاتك اللى عمرنا ما نسينا
من عمرو لقطز
لمحمد على اللى معاه علينا
واتمنيت أشارك فى ثوراتك ضد أعادينا
من الحملة الفرنسية للاستعمار الإنجليزي
ولحد حربنا فى سينا
اتمنيت أشوف عرابى والفريد محمد
والكامل مصطفى وكل من ربك اصطفى
وولاه علينا
وسعد زغلول مع شعبك الحمول
وناصر الحرية اللى معاه بنينا
سد عالى وطلعنا فى العلالى
وزرعنا وبنينا
اتمنيت لو اعبر ويا السادات وجنوده
وأغنى معاهم وقت ما يعودوا
سمينا وعدينا واستردينا
عزتنا وكرامتنا وحققنا لك كل ما اتمنينا
اتمنيت حتى لو اشارك
فى أول ضربة مع ابنك مبارك
واللى شارك بيها فى نصر
أرادهولك الله تبارك
واتمنيت لو انزل فى الثورة ضده
لما اتغير واستهتر بينا
شيء واحد ماتمنتوش
عام بحاله وياريتنى ماشفتوش
لما اتحكم السفيه وعصابته فينا
كفرونا واحنا المؤمنين بالله
خالقنا وبارينا
فتنة وشاعوها فى صحابنا وأهالينا
عليت الآهات واترسمت على وشوشنا
قسمات حزينة
بس اللى خلقك يا مصر
أبداً أبداً ما نسينا
وهو برضه اللى هينجينا
وهتعلى يا غالية وتسودى العالم
وانا عمرى ما هارضى مالم
تتحقق فيكِ كل أمانينا
والأمانى بتتحقق
وهنطول السما بإيدينا
ماهو ربك يا مصر أنعم علينا
بقائد أتمنى لو ابنى معاه
وادعى يارب احفظه وارعاه
لاجل مااغنى واقول وياه
اتمنيت ولقيت
وهتبقى دى أجمل أغانينا
حب - أرشيفية
