د. صبرى إسماعيل يكتب: يا ضمير العالم

أنا طفل صغير لكن إنسان
بحلم أحلام كل الصبيان
بحلم بوطن من غير طوفان
وبلا دخان وبلا استيطـان
أتعلم واجرى واعيش فى أمان
فى بلدى الحر بلا أشجان
بلا دمعة بلا بركان
ولا قســوة فى عــين سـجّان
والطفل يغنى نشيد يعزف ألحان
ويلاقى قلب الدنيا فرحان وسعيد
من غير حِرمان
*********
بحلم برجوع أهلى وناسى
بحلم بزمان
كان لينا زرع وقلع وبيت
كان لينا مكان
كان لينا وطـن اسمه فلسطين
زىّ الأوطـان
دلوقتى فى كل دقيقة شهـيد
والدم السايل فى الوديان
من أرضى طريد فى الدنيا شريد
من خوفى متعرفليش عنوان
راكبين البحر بلا رُبّان
والعـالم قلبه حجر صوّان
إشهدى يا سماء
إشهدى يانجوم إشهد يا زمان
سجّل يا تاريخ واكتب بأمان
ظلم الإنسان لبنى الإنسان
******
***********
يا ضمير العالم ليه نايم
ماتصّحى النوم قـوم كلّمنى
دا الظلم شديد والباغى عنيد
دمّر فى بلادى وقتِّلـنى
وحـريق ودمار
وعدو عربيد ما رحم سنّى
ليه ساكت على ظلمى وراضى
على ناس ظالمينّى وسارقينّى
قسما بالله أوفّيه
ل هارجّع كل ما راح منّى
والقدس هتفضل عربيّة
ع الراس فى القلب وفى الننّى
**********
وهقول لضمير العالم فـووق
فوووق
فيه طفل بريء وطنه مسروق
زرعه مخلوع قلعه محروق
دا الليلة طويلة وعاتمة
ما باين ليها شروق
والبيت هدّوه لاجل التوطين
لاجل التسكين
والباغى الغادر مالهوش ديـن
والمجلس نايم يا العالم
وقضية عويصة بقـالها سنيـن
وينهم أبطالك يا فلسـطين
فينهم أحفادك يا حطين
لو حقّى صحيح هيروح ويضيع
لازم هيردّه صلاح الدين!!
لازم هيردّه صلاح الدين!!