أثار الدكتور مبروك عطية، الداعية الإسلامى، جدلا واسعا فى الفترة الأخيرة بعد انتهاجه طريقة جديدة فى إصدار الفتاوى تميل إلى "الفكاهة"، وروح الدعابة مع متصليه فى تناول القضايا والمشاكل اليومية التى تتعرض لها الأسر المصرية، ويتفاعل "عطية" مع متابعيه بطريقة كوميدية تهدف فى النهاية إلى ايصال محتواه الدينى بطريقة يفهمها المتلقى البسيط.
يتعارك مع سيدة ضربت زوج ابنتها: "هتولعى انتى واللى جبوكى فى جهنم"
تفاعل الدكتور مبروك عطية، مع سيدة تطلب منه معرفة حكم الشرع حيال قيامها بالتعدى على زوج ابنتها بالضرب ومنعه عن مشاهدة ابناءه والزج به فى قضية أسرية والاستناد على شهود زور، قائلا "محدش هيعبر بنتك عشان الناس عرفت انك فتوايه وضربتوا طليقها، واللى انتم علمتوه ده 80 حرام يا بت.. والواد المفروض يشوف عياله ويحرق الجواز على اللى بيتجوزه بالطريقة دى وهتولعى انتى واللى جبوكى فى نار جهنم".
يرد على سيدة تشكوا زوجة أخوها: مش هترتاحى إلا لما يطلق مراته
ورد الدكتور مبروك عطية، على شكوى سيدة تطلب حكم الشرع فى زوجة شقيقها حيث تتهمها بأنها سبب قطيعته لوالدته ولإخوته، قائلا "انت ايه اللى عرفك إن مراته بتقومه على أمه، وأخوك له بيته ملناش دعوة بمراته ولكن احنا متعودين على الرغى وأنت مش هاترتاحى إلا لما يطلقها، ولكن فى النهاية اللى مش بيسأل على أمه يبقى قاطع".
فتاة تطلب حكم هروبها مع عشيقها: الله يحرقه هيذل أهلك
استفسرت فتاة على حكم الشرع فى خطبتها من شاب ثم انفصالها عنه أكثر من مرة وعدم استكمال الخطوبة، وطلبه منها الهروب بعيدا عن أهلها وعقد قران زواجهما، ورد الدكتور مبروك عطية عليها منفعلا "عايزك تسيبى بيت أبوك اللى رباك وأمك اللى شقيت.. الله يحرقه ولا يجى ولا يوعى يجى وأوعى تسمعى كلامه، والمفروض هو يجى لأهلك ويدرسوه.. وده عايزك تبيعى الدنيا وبعد كده هيقولك مامتك فى العشه ولا طارت، وبعد كده هيذلك وأهلك هيموتوا من الحسرة".
يرد على شكوى امرأة لكثرة جماع زوجها "جوزيه"
وطلبت سيدة حكم الشرع فى معاملة زوجها السيئة لها وتلفظه بألفاظ سيئة معها طوال الوقت، فضلا عن رغبته فى اقامة علاقات حميمة طوال الوقت، وفى حال رفضها بسبب تعبها يوجه لها السباب والشتائم، فخاطبها "عطية" "هو معذور ولو أنتى تعبانه يتجوز وهو عنده طاقة جنسية ومراته مش عندها استعداد، ولو عنده استعداد يبقى يتجوز اتنين كمان أو يكسر شهوته بالصوم عشان خاطر يتهد حيله.. وعن سوء الأدب مهما تكن الظروف ليس هناك مسوغ لسوء اللسان".
سيدة تطلب حكم الرقص والغناء للسيدات "روحوا على القلوب ساعة"
طالبت سيدة سعودية من الدكتور مبروك عطية معرفة الحكم فى تجمع سيدات مع بعضهن للترويح عن أنفسهن بالرقص والغناء مع التزامهن بأوقات الصلاة وقراءة القرآن، فرد عليها "ولا فيها حاجة.. والدين مش بالسكينة، وروحوا عن القلوب ساعة فإنها تصدى كما يصد الحديد، والمهم أثناء الغناء أو التواجد مع بعضكن ميكونش فى راجل شايفكم".
لسيدة تشتكى ضعف زوجها الجنسى "ممكن يتغير مع فصول السنة"
رد الدكتور مبروك عطية على شكوى سيدة من رجل ليس لديه قدرة جنسية من أول الجواز ولا يريد أن يصرف عليها رغم أنها ترغب فى الاستمرار معه بشرط الصرف عليها، قائلا "أول حاجة نقولها اعرضيه على طبيب ولها أن تصبر عليه عاما فهو ممكن يتغير مع فصول السنة، وبالنسبة لعدم الصرف هو كده اللى بيضيعها وأهبل وعليه أن ينفق عليها".
امرأة تشتكى من زوج يشرب الحشيش ويشاهد افلام إباحية
كما خاطب فتاة تشتكى من زوجها بعد اكتشافه أنه يشرب حشيش ويشاهد أفلام إباحية ويسيء معاملة أهلها ووالدتها وحياتها غير مستقرة ولكن يوجد بينهم طفلة عمرها عدة شهور، قائلا "ما دام فى بنت بينكم لازم ننسى روحنا ونفكر فى الطفلة ولو قطعتوا هتشوفى الويل فى مجتمع زبالة والطفلة هتخرج لمجتمع من أطفال الشوارع حتى لو عايشة فى سرايا ووجود الوالدين فى حياة الابناء مهم ويجب ان تنسوا انفسكم وتفكروا فى طفلتكم".
