لما الوجع يملأ قلبى هعلى صوتى وأصرخ
لما أشوف دموع الأمهات على ولادها لازم أصرخ
أصرخ وأصرخ وأملا الكون كله بصوتي
مقهورة أوى من جوايا كل يوم شهدا ومخطوفين ومش بأيدى حاجة اعملها ولا عارفة أغير أى حال يبقى لازم أصرخ
فين الأمن فين الأمان كله خايف وهو ماشى فى أى شارع يمكن يدوس على حاجة فى الأرض تبقى سبب نهاية حياته، ويتلم عليه الناس واللى حيبكى واللى حيصرخ على منظره وحتلاقى واحد معدى حيبص ويضرب كف على كف من غير كلام أصله متعود يشوف الحاجات دى كل يوم كأنها حلقات مسلسل درامى بيتفرج عليه الجميع فى كل البيوت.
لازم أصرخ لما ألاقى واحد رايح يشجع فريقه والفرحة مالية قلبه ويموت من غير سبب وكل ذنبه بيحب لعبة من سنين
لازم أصرخ لما لقيت ضابط شريف بيتسحل من شوية مجرمين بيبهدلوه ويدبحوه وكمان بيصوروه علشان يتباهوا بجرمهم.
ولما شفت فيديو الكساسبة وهو بيتحرق لكنه وقف ثابت كله عزة وشجاعة من غير ما يصرخ أودام شوية قتلة مفيش فى قلوبهم رحمة سمعت العالم كله بيصرخ عليه يبقى لازم أصرخ زيهم اصلى إنسانة لازم أصرخ وأصرخ وأصرخ يمكن حد يسمعنى وحاجة تتغير والحال يتعدل من صرختى.
