ننشر نص أقوال المتهم بتعذيب أطفال دار أيتام مكة: كنت بعاملهم زى أبوهم.. وقت الأجازة بخرجهم ووقت الغلط بعاقبهم.. انفصلت عن زوجتى لأنها كانت بتشرب شيشة وسرقتنى.. وحررت ضدها محضر زنا

حصل "اليوم السابع" على أوراق قضية تعذيب الأطفال بدار أيتام مكة المكرمة بالطالبية، ونص تحقيقات النيابة العامة مع المتهم "أسامة محمد عثمان" مدير الدار، وزوجته "إلهام عيد" ومديرة الدار "منى محمد" وأقوال الشهود وأقوال الأطفال الضحايا وتقارير الطب الشرعى الخاصة بالقضية والتى أسدلت محكمة جنح العمرانية الستار عليها بمعاقبة المتهم بالحبس لمدة 3 سنوات مع الشغل والنفاذ وإلى نص التحقيق مع المتهم.

س: ما هو اسمك؟

ج: أسامة محمد عثمان 50 سنة، رئيس مجلس إدارة جمعية دار مكة المكرمة للأيتام الكائنة شارع العريش، ومقيم شارع الإسلام منطقة الطوابق فيصل.

س: ما هى تفصيلات اعترافك؟

ج: أنا كنت شغال مدرب رياضى، وتزوجت من السيدة إلهام عيد وسافرت فى سنة 91 إلى السعودية وفضلت شغال هناك وهى سافرت معايا هناك وعملت هناك فلوس حلوة لأنى كنت شغال مدرب رياضى فى الخطوط السعودية وفى عام 2006 فتحت جمعية خيرية ودار أيتام اسمها جمعية مكة المكرمة، وكانت ساعتها المسئولة عن الدار سيدة اسمها نجاح وفى عام 2008 زوجتى رجعت مصر اللى هى إلهام عشان أولادى يكملوا التعليم لكن هى أهملتهم، بسبب أنها كانت بتروح الدار وبتطول فيه.. وفى عام 2009 قررت الرجوع إلى مصر عشان حسيت إن مراتى مش هتعرف تربى أولادى ولم رجعت لقيت فى الدار عشرين طفل وطفلة أعمارهم من عمر يوم إلى عمر سنة وعملت تشطيب وغيرتها ودهنت الدار وغيرت السراير وكان فى مديرة مسئولة بس مش فاكر اسمها وكانت زوجتى بتيجى الدار كل أسبوع مرة أو مرتين عشان تجيب تبرعات للدار وكان بيتردد علينا أطفال نستلمهم ونسلم عن طريق الوزارة حتى استقر معنا ثلاث عشر طفلا، ودول اللى فضلوا بعد تسليم سبعة أطفال لدار نواة الخير ودول أنا اللى مربيهم وتبقى لدينا فى الدار اثنى عشر طفلا ودول أنا برده اللى مربيهم.

وأشار المتهم "أنا كنت بصرف على الدار من حساب الجمعية بالبنك، والحساب دا بييجى من التبرعات وكمان أنا بصرف على الجمعية من التبرعات العينية زى الأكل والشرب والملابس، وأنا كنت بتعامل مع الأطفال زى أبوهم وكنت بخاف عليهم بس أنا كنت بضرب العيال لما يغلطلوا وهما كانوا أشقياء وكانوا بيغلطوا كتير ويلعبوا فى التليفزيون وكان فيه عندنا تكييفات وكانوا هما بيعلبوا فيها ويعملوا شقاوة زى كده كنت بضربهم بعصاية خشب عقاب ليهم والضرب كان جامد شوية بس عشان هما أشقياء.

وقال المتهم "ومن حوالى سنة وأربعة شهور زوجتى إلهام لما عرفت أنى تزوجت عليها جت فى يوم وصورتنى وأنا بضرب العيال ويومها أنا ضربتهم عشان لعبوا فى التليفزيون والكهرباء وأنا كنت بضربهم جامد، وإلهام ساومتنى بالفيديو ده عشان ماتبلغش النيابة وعملت ليها محضر مساومة بس ما قلتش فيه سبب ضربى العيال، وكانت ربما عايزة فلوس مقابل الفيديو، وهى سرقت منى مبلغ مالى وقدره سبعة وأربعين ألف جنيه، وعملت بيهم محضر وفضلت برضوا تساومنى على قصة ضرب العيال وفى يوم 31 يوليو من العام الحالى عرفت أنها بتخونى مع واحد اسمه سعيد اسماعيل وده من مكالمة تليفون مجهولة وروحت العنوان اللى اخدته ولقيت مراتى لابسة قميص نوم اسود وهو كان لابس بنطلون وفانلة حمالات وروحت عملت محضر بالكلام دا ومعرفتش اتخانق معاه ورقم المحضر 5933 ادارى الساحل وهو تانى يوم على طول اخد الفيديو ونزله على النت وعمل بلاغ فى النيابة".

س: ماهى صلتك بدار أيتام مكة المكرمة؟

ج: انا منشئ الدار وصاحبها ورئيس مجلس الإدارة منذ عام 2006 .

س: ما سبب إنشاء تلك الدار؟

ج: أنا قولت أعمل عمل خير عشان اليتامى.

س: ماهى كيفية إنشاء تلك الدار وما المستندات التى قمت بتقديمها؟

ج: أنا أجرت شقة واشتريت أثاثا، وقدمت الورق للوزارة عبارة عن عقد إيجار شقة باسم الجمعية، وجت ناس من التخطيط الهندسى والمطافئ وأخدت موافقة شفوية وقدمت المستندات إلى الوزارة وجت لجنة للمعاينة وبعدين أخدت التصاريح.

س: ما هى كيفية تسجيل الأطفال بالدار لديك.. وماهو العدد المتاح لديك فى تسجيل الأطفال بالدار؟

ج: احنا بناخد الطفل من القسم وتبقى وسيلة اتصال دائمة بالقسم وفى حال وجود طفل لقيط بروح القسم عن طريق موظفة عندنا معاها تفويض من الجمعية لاستلام الطفل ومعاها الإشهار للجمعية، وبعدها نروح النيابة عشان ناخد قرار إيداع الطفل وبعد كده نعمل شهادات للطفل من الصحة والوزارة وبعدها الطفل يبقى مسئول مننا، والعدد المتاح لدينا هو عشرون طفلا وطفلة مجهولى النسب.

س: ما هى كيفية الإنفاق على الأطفال.. وما مدى وجود مصادر أخرى للجمعية؟

ج: عن طريق حساب الجمعية بالبنك وأى حد بيتبرع نعمل إيداع للفلوس دى إلى البنك، وبعد كده يروح حد من الموظفات بشيك من الجمعية لسحب الفلوس اللى محتاجاها الجمعية، ولا يوجد مصادر أخرى هو حساب الجمعية بس.

س: ما هى كيفية رعايتك لهؤلاء الأطفال؟

ج: هما الصبح بياخدوا دوش وبعد كده بيفطروا وبعدها يقعدوا على السفره وبعدها بتيجى المشرفة الأخصائية تجى تديهم أحاديث نبوية بعد كده بيتفرجوا على الكرتون وبعد كده يعملوا الواجب وده كان يوميا، والساعة 2 يبقى معاد الغداء وبعده بيكون فى حاجه حلوة وده يبقى الساعة الخامسة مساء والثامنة مساء بيكون معاد العشاء يوم الخميس بيكلوا كشرى وبيناموا التاسعة مساء.

س: من يساعدك فى إدارة تلك الجمعية؟

ج: هو اللى بيساعدنى مديرة الدار منى محمد سيد وأنا اللى معينها والمسئولة من الساعة التاسعة صباحا وحتى الساعة التاسعة مساء وكمان فى مشرفة مقيمة هى والأخصائية شيماء وفى اثنين مربيات وهما سحر وهدى وأنا المختص بتعيينهم.

س: من هم أعضاء مجلس الإدارة وما هى علاقتهم بالدار؟

ج: أعضاء مجلس الإدارة منى محمد رئيس مجلس الإدارة وحميدة أحمد أمينة الصندوق وهى والدتى ودينا أحمد وهى عضوة وبتعمل سكرتيرة بالجمعية وسمير عادل وده أمين عام الجمعية.

س: ما هى مصادر دخل الأطفال وما مدى رقابتك عليها؟

ج: كل طفل عنده دفتر توفير وكل طفل عنده كفيل بيكفله وفى إيصالات كفالة والمبلغ اللى بيجى بيتحط فى دفتر توفير الطفل وماليش أى رقابة مالية عليه.

س: ما هى الجهة الرقابية المنوط بها رقابة أعمالك؟

ج: إدارة مختصة داخل وزارة التضامن الاجتماعى والأسرة والطفولة بالعجوزة، والإدارة العامة للأسرة والطفولة وإدارة العمرانية وإدارة الطالبية للأسرة.

س: ما مدى وجود ملاحظات أو شكليات ضدك؟

ج: لا أنا مجاش ليا أى ملاحظات.

س: متى بدأت فى جمع تبرعات تلك المؤسسة؟

ج: منذ عام 2007 وهو فى واحد ثابت معايا بيدينى 2000 دولار.

س: ما هى المستندات الرسمية المسلمة إليك لإثبات تلك التبرعات؟

ج: أنا طابع إيصالات باسم الجمعية وبسلم أصل الإيصال للمتبرع و2 صورة فى الدفتر بيفضلوا معايا ولما يجى التفتيش يطلع على أرقام الإيصالات ويعرف أن البيانات سليمة ويكتب تقريره.

س: ما هى كيفية قيام الجهات سالفة الذكر بحصر ومراجعة تلك المستندات؟

ج: هو بيراجع ورقة ورقة وبيشوف إذا كان قيد حصل لأى بيانات ويراجع الأوراق ويجمع المبالغ بتاعة التبرعات ويراجع حساب البنك عشان يعرف إذا كانت التبرعات دخلت الحساب ولا لا.

س: ما هى كيفية تعاملك لأطفال الدار.. وما هى كيفية معاقبتك لهم؟

ج: أنا بعاملهم زى والدهم ووقت الأجازة بخرجهم ووقت الغلط بعاقبهم، وأنا اللى بيغلط عندى باضربه بالعصاية الخشب وبعمل كده برضوا مع أولادى لأن أنا بخاف عليهم وهو الضرب اللى بيجيب معاهم نتيجة عشان هما أشقياء.

س: ما هى الأخطاء التى يرتكبها هؤلاء الصغار؟

ج: يعنى مرة بنت خرجت عند الأسانسير وأنا ضربتها بالعصاية على أيديها وفى مرة طفلة راحت عند البوتاجاز.

س: ما هى كيفية تعديك على هؤلاء الأطفال؟

ج: أنا بضربهم بالعصاية على أيديهم وعلى أردافهم لما يغلطوا وبالشلوت والأقلام وأنا مش دايم التعدى عليهم بالقدم زى ما طلع فى الفيديو وهو أنا كنت دايما استخدم معاهم العصاية، وهما دايما بيعيطوا بس أنا كنت باعمل كده عشان أربيهم.

س: كم عدد المرات التى قمت فيها بالتعدى على الأطفال.. وما هى الأداة المستخدمة؟

ج: انا بضربهم بس لما يغلطوا أو يعملوا شقاوة وتقريبا أنا كل أسبوع لما يغلطوا أو يعملوا شقاوة بضربهم، وكنت بضربهم بعصاية خشبية بتاعة السرير.

س: ما مدى حدوث ثمة إصابات بهؤلاء الأطفال نتيجة ذلك التعدى؟

ج: أحيانا يمكن ايديهم تورم.

س: ما مدى مشاهدة أى من العاملين أو موظفى الدار على تلك الأفعال؟

ج: لا

وقام مجرى التحقيق بالنيابة العامة بعرض الفيديو الذى تم تداوله على صفحات مواقع التواصل الاجتماعى والذى يظهر به المتهم وهو يقوم بالتعدى بالضرب على الأطفال.

س: ما علاقتك بالفيديو الذى تم عرضه عليك؟

ج: أنا فعلا ضربت العيال اللى فى الفيديو بس أنا كنت خايف عليهم عشان الكهرباء والتليفزيون اللى فتحوه ووقعوه.

س: ما قولك فيما جاء بقسوة المشاهد وقسوة التعدى على الأطفال.. وما قصدك من تلك الأفعال؟

ج: أنا مكانش قصدى غير إنى أربى العيال عشان كنت خايف عليهم أحسن يتكهربوا، وأنا مكنش قصدى أنى أضربهم أنا قصدى إنى أربيهم.

س: ما هى علاقتك بالمدعوة إلهام عيد؟

ج: هى مراتى ولكن أحنا شبه منفصلين من حوالى سنة تقريبا وبينا قضايا ومحاكم.

س: متى نشبت تلك الخلافات.. وما سببها؟

ج: من حوالى سنة وشهرين، عشان هى بتشرب شيشة صبح وليل وهى سرقت الخزنة بتاعتى وعليها قضية سرقة قبل كده، وأنا معايا منها ثلاثة أولاد، وأنا عامل ليها محاضر وهى عملت ليا محضر تمكين من شقة الزوجية.


موضوعات متعلقة..
محامى المتهم بتعذيب أطفال دار أيتام مكة يستأنف على حكم حبس موكله

حبس المتهم بتعذيب الأطفال بدار الأيتام 3 سنوات.. الدفاع: فوجئنا بالحكم اليوم وسنقدم استئنافًا ضده.. والمحكمة لم تستجب لطلبات الدفاع.. والمتهم تحدث للمحكمة بالجلسة ولم ينطق بعد الحكم