"من بيوتنا".. موقع جديد للأكل البيتى لكل ستات مصر الغلابة

خارج عالم الحسابات والأموال، صنعا عالما بقوانين خاصة تضع العمل فوق كل اعتبار وتفتح لكل سيدة تمتلك "بوتاجاز" فقط، فرصة فى حياة حقيقية ومصدر دخل دون طلبات ودون البحث عن أموال أو تكاليف مشروع، موقع صغير على الإنترنت يتيح الدخول عليه لكل سيدة أن تفتح مطبخها الخاص بوجباته المصنوعة بنفحة "بيتية" والأسعار المطلوبة فيها، بينما تتيح للجانب الآخر من الشباب "العزاب" أو السيدات العاملات الفرصة للتجول بين المطابخ المصطفة محملة بأكلات المحروسة الحقيقية بعيدًا عن عالم الـ"تيك أواى.

قبل 6 أشهر بدأت الفكرة، ويحكى مصطفى رأفت، الذى صمم الموقع مع زوجته سارة أمين "تابعنا تقريرا مهما بالفيديو، عمله الشيف العالمى جيمس مارتن عن تحضير الأكل السريع وبيوضح إن الأكل حتى فى أفضل المطاعم يتم إعداده بشكل غير صالح للاستهلاك الآدمى، ورغم بشاعة الفيديو لما فرجنا عليه أولادنا فضلوا حابين الأكل السريع، وكان الحل إننا نوفر لهم أكل سريع لكن فى نفس الوقت بيتى".

بابتسامة نجاح تلتقط "سارة" أطراف الحديث "أهم حاجة إن الموقع بيقدم كل الخدمات مجانًا، من أول إنشاء المطبخ لحد التواصل مع العملاء وإتمام البيع، مافيش فلوس بناخدها، وكمان بنتأكد إن كل المطابخ من البيت فعلاً، وأى حد عنده مطعم وبيحاول يسوق له عندنا بنقفل مطبخه فورًا، وبعد طلب الأكل بيكون مطلوب من كل مستخدم يقول رأيه فى المطبخ عشان اللى هيطلب بعد كده يعرف المطبخ حلو ولا وحش".

إضافة إلى الحفاظ على صحة الأطفال كانت مساعدة السيدات الفقيرات أحد أهم أهداف الموقع، وهنا كانت العقبة الأولى، فالموقع بالطبع داخل حدود شبكة الإنترنت التى لا تملك تلك السيدات مفاتيح دخولها ليقع الزوجان فى ورطة لكنهما نجحا فى تخطيها "بدأنا ندور على الستات، ونتواصل مع الجمعيات الخيرية ونعلمهم لحد ما دلوقتى بقى عندنا حوالى 40 مطبخ بتعيش عليه 40 أسرة فى منهم مصريات وفى منهم سوريات".

مصطفى وسارة استعانوا لإتمام الموقع بزميلهما مصمم الجرافيك "ماهر ناجى"، والآن يستعدون لخطوة جديدة "المشكلة إن فى ستات كتير ما بتقدرش تتفق مع حد يوصل الأكل للعملاء وعشان كده هنعمل خدمة توصيل من خلال شركة متخصصة فى المجال دا، هيكون التوصيل بنفس أسعار الشركة مباشرة، وطبعًا من غير أى أرباح لينا".