محمد عبد الله طاهر يكتب: كل أملى من الدنيا نظرة

أكل العيش ودانى لبلاد بعيدة
كان نفسى أعيش فى بلدى
بس الدنيا معايا كانت عنيدة
واحشنى هواكى يا بلدى
وحشتنى العنبة اللى فوق الجريدة
واحشنى ترابك يا بلدى
ولو عشت فيكى عالحديدة
نفسى أرجعلك يا دارى
أرجع واشكيلك مرارى
نفسى أجيلك يا غالية
وتبقى نهاية مشوارى
غبت عنك سنين
مشتاق قاتلنى الحنين
سنين مش محسوبين
من عمرى مبتورين
واحشنى فيكى حاجات كتير
واحشنى ناسك والقلب الكبير
ده الحب ماسة زرعتيها فينا
وعلمتينا نحب بضمير
واحشنى قمرك وحشانى شمسك
وحشتنى نجومك وسكونك وهمسك
بعدى عنك خلانى اشتاق لك
واشتاق لاسمك فى كل لحظة
وأيامى الجاية هعيشها جنبك
ده أنا كل أملى من الدنيا نظرة