حاجة منى ولّا منّك
عيب دا عندى ولّا عندك؟
نفسى أعرف بس منك
إنت ليه ف حبك بخيل؟
كل كلمة بالحساب
و السؤال قده الجواب
فى الفرح زى العتاب
الكلام منًك قَليل
ليه بشوفك وش جامد؟
ليه بحسَك قلب بارد؟
ليه مفيش أبدا ً مشاعر
والبرود هوا البديل؟
حتى لما بتبتسم
بسمة باهتة بتترسم
زى ما تقول الابتسامة
شىء على نفسك تقيل
هوا حبك لو ظهر
يبقى ذنب ما يتغفر
ولّا يبقى ضعف منك
والميزان بينّا يميل
الطبيعى إنى حبيبتك
ع الأقل أبقى شريكتك
إيه هيجرى لو فى مرة
جيت تقولى كلام جميل
يمكن إنت عاشقنى واكتر..
بس مش عارف تعبّر
بس أنا مش عايزة منّك
غير كلام مش مستحيل
مش بقول عايزاك رومانسى
فى الهوى تنسينى نفسى
بس أحس إنك حبيبى
مش أحس إنك زميل
مش بقولك تبقى شاعر
بس فى حبة مشاعر
ضحكة صافية.. همسة دافية
دمعة حتى لو تسيل
دا إنت حتى..
دا إنت حتى ف لحظة خاصة
مش بروحك ببقى حاسة
لحظة بتعدى ف بلادة
وف برود ملهوش مثيل
رغم إخلاصى ووفائى
واحترامى وكبريائى
خايفة قدام غيرك أضعف
ولكلامه اسمع واميل
لو كارهنى.. قول.. صارحنى
حتى لو عايز تسيبنى
فى الحياة أنا وإنت لازم
بكرة هنصادف بديل
حاجة منى ولّا منك
عيب دا عندى ولّا عندك
نفسى أعرف بس منك
إنت ليه ف حبك بخيل؟
صورة أرشيفية
مشاركة
اضف تعليقاً واقرأ تعليقات القراء
مشاركة
