قال المنولوجست عصام بركات إن الإقبال على المونولوج والنكت الفترة الحالية وخاصة فى الأفراح فى تراجع كبير، بسبب اختلاف الجيل الجديد، ووجود "الدي جي"، فضلا عن اختلاف طرق الضحك للجمهور.
وتابع خلال لقائه في برنامج "صاحبة السعادة" مع الإعلامية إسعاد يونس على شاشة قناة dmc: "الدى جى أثر على المنولوج ومبقاش فيه طلب عليهم، وكمان الجيل الجديد مش هيضحك على النكت بتاعت زمان، لأن النكتة من العصور القديمة، وكمان النكتة الواحد عمل حاجة والتانى بيضحك عليها، لكن بعض النكت الجديدة بيبقى فيها تنمر".
وأعرب عن خوفه في البداية من لقاء الفنانة القدير إسعاد يونس، قائلًا: "كنت خايف وأنا جايلك عشان مش عارف ازاي أضحكك وانت اشتغلت مع كل الكوميديانات، وخلال حياتي أنا متعرضش عليا تمثيل، ونفسي يكون ليا فرصة أخوض مجال التمثيل قبل نهاية عمري".
كما تحدث عن موقف جمعه بالفنان حلمي بكر، موضحًا: "أستاذ حلمي بكر بيعجبه حاجتي، بعد حفلة مارينا جالي تليفون قالي عايزينك في برنامج "بين شطين ومايه" وأستاذ حلمي بكر طالبك بنفسه، ولكني رفضت بعدها لقيت فريال صالح بتكلمني بنفسها بتقولي مش عايز تيجي ليه قولتلها دانا بسألها على الميعاد، ولما روحت وهي بتقدمني أستاذ حلمي بكر قالها انا اللي طالبه، قالتله كان خايف ييجي قالها لا كان كويس جدا، وأعجب الناس، ودي شهادة أعتز بيها".
