فى لفتة انسانية جميلة تعودنا عليها من أهل مصر عامة ومحافظة المنوفية خاصة فى كل شهر كريم يطل علينا رمضان بخيره ليخرج أهل قرية جروان التابعة لمركز الباجور المنوفية على الطريق الإقليمى الدائرى لتوزيع وجبات إفطار صائم على المسافرين.
ويقول أيمن الدهشورى، منسق المبادرة، "بقالنا 11 سنة على الوضع ده وكانت البداية 30 شنطة خير بنوزعها على اهالينا فى القرية من المحتاجين وبعد كده اتطورت الفكرة والشنطة بقت وجبة بتتوزع على الناس فى بيوتها ".
وتابع، "المحتاج والمسن اللى عايش لوحده فى البيت هما الفئة المستهدفة من الوجبات والاولى وبعد كده بنوزع على الطريق للمسافرين، كل ده بمجهود ذاتى وتبرعات ذاتية من الاهالى فى القرية وخارجها وايضا خارج مصر".
وأردف: "المتطوعون بيعملوا ده بحب غير طبيعى وجيل بيسلم جيل هنا منهم الدكتور والمهندس والظابط، بتبدا فى اول الشهر ب 400 وجبة وبتزيد مع الايام حسب كرم ربنا سبحانه وتعالى".
واستطرد، "من المواقف الجميلة اللى بقابلها ان المستفيد هو المتبرع ولو بجزء بسيط، وكمان لما بنقابل اخواتنا الاقباط واحنا على الطريق ونديهم بيرفضوا ياخدوا ويقوللنا اخواتنا الصائمين اولى واحنا نصمم انهم ياخدوا".
