يا ابنى يا طرح عمرى ال بزرعة من سنين
وارويه بنبض قلبى واسقيه الحنين
كل يوم بتكبر قدامى يا نن العين
ولما اشتد عودك وبقيت الشاب الزين
حسينا بالأمان وعليك مسنودين
راجل وشهم وطيب وبار بالوالدين
ولما نداك الواجب لبيت وقلت آمين
وروحت مضيت على العهد وحلفت اليمين
لازم أصون ترابها وأرفعها فوق الجبين
أول ما شوفتك بالبدله راجل وملو العين
من فرحتى بيك كأنى رجعت للعشرين
ودعتنى من يومين رايح يا ولدى لفين
خلاص يا أمى، مسافر دول هما يدوب يومين
ختك فى حضنى أوى والدمع ملا العين
خليك يا قلب أمك حتى كمان ساعتين
وكأنى كنت حاسة وكنت على يقين
عين الحقد سيف غدروك الغدارين
وبكل قلب بارد قتلوك المجرمين
قلبى اتخلع من مكانة لما سمعت الرنين
وقف بيا الزمان ونسيت مكانى فين
نولت الشهادة يا عمرى وسيبت قلبى حزين
إزاى أوصف شعورى بفراقك والأنين
راحت زهرة شبابى وراح نور العين
ومين يحس بنار صدرى غير رب العالمين
هو المعين ،،، وراضيه بالمكتوب عا الجبين
تم أضافة تعليقك سوف يظهر بعد المراجعة