قال الدكتور حمدى السيد نقيب الأطباء الأسبق خلال لقائه ببرنامج من مصر مع الإعلامى عمرو خليل المذاع على قناة cbc، كنت متوقع مشاكل تحصل بعد انتخابات 2010، لأن لأول مرة تقوم الأجهزة المسئولة عن الانتخابات بالتزوير الفاضح بدون ما يعملوا حساب من اللى بيشوف وكان التزوير يتم وأنا شوفت 7 دورات انتخابية أول مرة أشوف المظهر ده.
وأضاف: انتخابات 2010 كانوا بيدخلوا بميكروباصات مجموعة وتدخل اللجان، ويقفلوا الأبواب ويخرجوا الناس برة ويدعوا انهم بيصلوا، ويقعدوا يقلدوا ويألفوا، فى انتخابات 2010 أنا كنت حاصل على 10 آلاف صوت واللى ورايا على طول 1000 صوت ولقيت نفسى واخد 4 آلاف صوت واللى ورايا واخد 14 ألف صوت.
وتابع: المفاجأة كانت دخول الإخوان يوم 26 يناير 2011 كان فى مؤتمر عن الطب النفسى وأنا كنت بحضر علشان أقول كلمة لأن أنا كنت النقيب ولازم أقول كلمة أحيى فيها الحضور، اتصلت بعصام العريان وقالى إحنا قررنا إننا ما نزلش الثورة دى علشان عيد الثورة بتاع الأمن واحنا ما حبيناش إننا نزعل الأمن، استغربت لأن كل اللى نزل فى 25 كان شباب متحمس مالوش لون مش ناصرى ولا يسارى ولا إخوان، كان الدافع الوحيد لهم هو الدافع الوطنى.
