من باب الرحمة يجب أن نراعى إحساس الذى أمامنا وأن نعاملة معاملة حسنة لوجه الله سبحانة وتعالى، فى أشياء تحدث منا بطريقة غلط فى غلط.. تطلب أوردر من السوبر ماركت يوصل الديلفرى يدق الباب عليك تأخذ منه ما طلبته، تقوم هوبا قافل فى وشه الباب بطريقة مسيئة جدا للأسف الشديد، وطبعا هو عمره ما هيتكلم ولا هيقولك ليه كده يا أستاذ ولا أى شىء، هيتحمل لأن ده أكل عيشة، لكن لو حسبتها بشكل آخر هتلاقى حضرتك غلطان غلط بشع، وهقول حضرتك ليه؟ حضرتك لما تفعل هذا التصرف الخاطئ بتاع الديلفرى بعد ما ينزل من عند حضرتك هيحبط ونفسيته هتتعب من هذه المعاملة اللا آدمية، ويقعد يقول فى عقل باله طيب ليه الناس بقت كده؟ ليه الأصول مش موجودة، وليه وألف ليه وليه؟ وهو عنده حق طبعا يبقى حضرتك جرحت نفسيته، وبدل ما يذهب إلى السوبر ماركت مرة أخرى عشان يأخذ أوردر غيره هيقرر أن يسيب السوبر ماركت، لأن حضرتك عاملته بشكل لا يليق، فيجب الانتباه مننا إحنا أولاً فى التعامل مع بعضنا البعض، يجب أن تكون هناك رحمة جوانا فى التعامل مع جميع البشر.. يعنى بتاع الزبالة نعاملة أحسن معاملة لأنه انسان زيى وزيك، ولو نقدر نساعده نساعده ، وأى شخص يحتاج مننا المساعدة وأنت تقدر تساعده ساعده ، وأكيد ربنا هيوقف جنبك أولاد الحلال ، لو احتجت مساعدة من أى شخص، هتلاقى اللى يساعدك، ده من باب الرحمة .
