مشيت فى الشارع وسط كل الأديان
كل واحد فى سكته قلبه بالأمل مليان
شباب من الجنسين وعواجيز زمان
عواجيز بركة نعمة الخالق الرحمن
السكة بالمية متلمعة بمزاج الصبان
الشجر بالندى بيسرح على الشطآن
وشقاوة السمك تنادى معدة الجعان
سرينة العربية عند اللزوم بس امان
طاعة اشارات المرور بدون عصيان
امى تقول اسمع القطر قبل المزلقان
الرصيف للى ماشى صممه منا فنان
خطوط الرصيف كلها موحدة بألوان
اخبار اهرام اشتريت بالقرش جرنان
والجمهورية كل يوم مسابقة القرآن
اشتريت سندوتش سكلانس بادنجان
فول بطعمية وكيس السلطة بالمجان
تعظيم بسلام للجنيه ابو مدنه وآذان
كان سيدهم من الحيازة به قيراطان
بجمع القطن الزغاريد والكل فرحان
البت هتتجوز وهنشترى جوز خرفان
فى الاتوبيس غابت سيجارة الدخان
ممنوع التحدث مع سواقنا الرهوان
مفيش وقوف الكل قاعد كأنه بستان
صوت الشيخ رفعت يغذينا بالرحمن
دعاء النقشبندى عزف منفرد ككمان
الكمسارى نكته مع تذكرة بنا فرحان
آخر المحطة واشوفكم تانى ياجدعان
سمعت قلبى بيغنى غنوة انا الانسان
صحيت الله يرحم الزمان وأيام زمان
ياريتنى ماصحيت انا منه فى حرمان
فى كل حته كنا بطيبة القلوب جيران
ايام كان كل انسان بحبه للغير انسان
أدب اللسان فى الشارع الكل به دفيان
وخجل العيون كانت غطا تحت اجفان
دا حلم عشناه بسابق العصر والأوان
تم أضافة تعليقك سوف يظهر بعد المراجعة