مفطّراتى.. ماشى بآلاتى
ويّايا طبله.. بانده يا أبله
عنتر يفطّر حبيبته عبله
ويّايا آله.. ماشيه بتكاله
شاعر يا خاله ومغنّواتى
مفطّراتى.. ماشى بآلاتى
بنقول له يالله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
شايل أمانه.. والناس حزانى
كالعاده قاعد ورا الخزانه
عبده الحالانجى.. لابس أرنجى
مين اللى فرّق أبيض وزنجى
والكلّ طابب على الميزانه
قالوا اسمعونا.. قلنا بأمانه
يا ولاد بلدنا.. قولوا لولادنا
رمضان أتانا بالخير وعادنا
كبّر يا عمّ فوق أىّ مدنه
رمضان وعدنا وصدق معانا
بأنده عليكى.. علشان عنيكى
لفّيت حوارى.. ساعة العصارى
ومشيت أغنّى فوق الكبارى:
● ● ●
يسعد صباحك يا مصر الساكنه جوّاها
مشتاق أضمّك... عشان مشتاق لرؤياها
يا ورد قلبى انفرط.. عناقيد على عناقيد
يا ورد ضلّل عليها...... وحطّها معاها
● ● ●
يسعد صباحك.. صباحك ريحته فوّاحه
يا ام الضفاير دواير...... والبدن ساحه
يا سحابه فايته... وجناين ورد طرّاحه
قلت الصراحه... وصراحتك لسّه خافياها
● ● ●
أجمل صباح ع الجميله.. أم الخميله شراع
داير باقيس المسافه ما بينّا...... شبر وباع
متباع وساكت لأنّك.. واخده روحى شعاع
واهتم ليه باللى باع.. طول ما انتى شارياها
● ● ●
مفطّراتى.. ماشى بآلاتى
ويّايا طبله ومغنّواتى
بنقول له يالله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
