على بُعد غصة حزن من قلب الرؤى
رِجل المعاني بتنجرف نَحو العدَم
والناس بقع من دَم بتخبَّط في دَم
واتخن جبل بالإكرامية طول قدم
كورنيش بيرمي البحر ع العُشاق
أيام بلا أشواق
عركة في ولاعة
وخُزاعة بتلاعب ريال مدريد بدون جمهور
نار وانفجار لزهور
ونسر ناطط م العلَم ...
بيسبَ طول الوقفة بين الكدابين
يلعن سنين الصبر ع الزيف والعطَن ..
في المؤتمر / في الإحتفال / في خطاب بطعم الدولة مش ريحة الوطن
شايف نبي فارش بتحويجة قيم
وبنو النضير وقريظة رايحين برشلونة
وموسى من غير أم أو فرعون ويم
ونيتشة بيعلِّم على الأخلاق
والشمس نازلة تسف على كل العِمم
شايف حُمَم
وشجر بيجري بس في دماغي
أشلاء شغف لاغي
كام كارثة بتلاغي
وخطاوي هايجة ع اللي مشيوها
وغيطان قصب حالفة لتدفع عمرها
من أجل أخد التار من اللي أجرموا ... وشربوا العصير
إلحقني من قصف المصير
احدفني برا التجربة
شايف طاووس بيبوس أيدين الأغربة
والأتربة ضل الجميع الأتربة
يا أهل مصر الطيبين
يا أهل مصر المحرومين
يا أهل مصر المغرمين
يا أهل مصر المجرمين
يا أهل زيمبابوي و هانوفر والجابون والعطارين
استعصموا بسلاحف النينجا
وما تنادوش مازنجر
كل الحروب الجاية هتكون في المجاري
الآتي في المرَّة دي مش خال اللي جاري
العقل نقل الحلم للسوق التجاري
والقلب جدول ضرب للصيد في الحباري
طاب والبخاري .. حياة مقام سيدنا الفيشار
هتشوفوا خوف النسر من صوت القماري
وتهابوا رقص البحر على كيف الصواري
وهتعرفوا معنى التشبه بالرياح
والإنفتاح المر على ناب الأعادي
شايف زبادي أقسى من شغل الوظايف
شايف أمان مفروض وفيه الكل خايف
على بُعد غصة حزن من قلب الرؤى
شايف غموض واضح على الآخر
شايف غضب زاخر
شايف فراولة راكبة دبابة
زانقة المدينة ف حتة متسابة
كافة صوابع بكرا سبابة
شايف جحيم ساخر
شايف جحيم ساخر
