الأذى مفيش أسهل منه
لكن الصعب تبعد عنه
والمؤذى لا تصاحبه ولا تأمن له
لا صحبة تعمر ولا عشرة تدوم له
والنذل على حاله مهما تخاويه
لا شيء يعدله ولا حاجه تشفيه
واللى يعمله فى الناس النهاردة
بكره الايام تجيبه وتوديه
فيه ناس كده بوشين
وش يضحك معاك
و عليك يتكلم بالساعتين
ومفيش مانع من مهموزتين
او كدبة وحلفان يمين
يا داهية دقى على السنين
ناس بجحه وليها عين
تقلب الحق باطل
طول ما فيه القرشين
تنطق بالعسل وجواه السم
ولا عندها ريحة الدم
فى الوش مراية
وفى القفا سلاية
تبيع الايام و العشره
أحلف وأبصم بالعشرة
طلعوا فالصو وقشره
من بره الضحكة حلوة
ومن جوه عتمه وكشره
خساره فيهم العشره
لو فيه مصلحة
صاحبى وحبيبي
ولما تخلص
يا صحبيه غيبي
وكفاية كده
لا هقول وهاتي
نزلوا خلاص من حساباتي
سقطوا خلاص من نظري
ويا ريتنى عرفت بدري
لكن ده نصيبى وقدري
خلاص كده جبت أخري
لا ينفع عتاب ولا لوم
ولا نرجع لبعض فى يوم
اصل الطبع غلاب
الأصل الطيب غاب
والطبع الواطى غلاب
غدار بياع كداب
لابسين توب الفضيلة
من اصل وعيلة
أخر الكلام
راح أقوله وبعدها سلام
كفاية تقليب فى المواجع
وسكين الغدر واجع
لا الغلط راح نافع
ولا اللى راح يوم راجع
