سكة رجوع
امسح
من دفتر أحلامك
حلم...
واحلم بالموت
اتلون ببراح الكون
واحلم بالموت
يمكن لما تموت
ترتاح...
أوعى تصدق
وارجع ....
عيش .....
لو مش لاقى
رغيف العيش
ارسم بكرة بلون الكون
مهما تكون ....
انت الفكرة ....
كوباية الشاى
على رف الحلم بتتدارى
ورا باب مقفول ...
النور مقتول ....
ونهار الخوف
بيكفن أحلام المساكين
على شط حزين
وأنا مش سامعاك
فنجان القهوة
بيترجاك تستنى هناك
ده فى عز اليأس بيغنى
مع نور الشمس
ليالى هواك ...
وأنا لسه معاك
والليل متخبى ...
بيجرى وراك ...
عند الشباك المتحنى
ببواقى الخوف
مش عايزة أشوف
غير الفرحة ...
حاسة بزهقان
ما أنا قلبى جعان
وكمان الليل واقف ضدى
مش عايز يسمح لملامحى
تنكر جرحى
سجل بحروفه الملضومة
دمع وأحزان
بواقى الموت
وفى قلب تابوت
سابنى لوحدى
ما أنا عايشة بموت
ميت مرة
فى الثانية الواحدة مع الأيام
ما انت قفلت الباب وبكيت
يومها استنيت
ترجع تانى
وتلون عمرى بلون الحب
دا المبتدى
فى المنتهى سكة رجوع
ليه الدموع
والمحبرة
مليان بالأمل الزلال
اشرب أمال
من جوه حضن القلب
وارسم خطوتك
اوعى تغير سكتك
من أول السطر ابتديت
ولا انتهيت
الحلم ساكن دنيتك
تم أضافة تعليقك سوف يظهر بعد المراجعة