تِبقَى غلطة لو نكمِّل
وِأنتَ مش حاسس هوايا
مهما تكدِب أو تجمِّل
إنتَ قلبَك مش معايا
بَبَقى قاعدة معاك وحاسَّة
إن فِكرَك راح بعيد
تبتسم وأنا بردو عارفة
إن قلبَك مش سعيد
تفتكِر لمَا نادتنى ..
رُحت ناطق اسمها؟
وقتها اتأكدت إنَّك
لِسّه عايش حُبها
حتى لمَّا تجيب هدية
بَلقَى ذوقها وروحها فيها
تيجى وتقوللِى دى ليّا
وأنتَ قصدَك تِبقى ليها
هيّة غايبة .. بس حاضرة
مهما بتخبِّى .. بشوفَك
مش هقولَّك .. إنت أدرَى
بس خايف من كسوفَك
كنت فاكرة انَّك نسيتها
وان روحها بعيدة عَنّا
بس فى الآخر لِقيتها
واقفة طول الوقت بينّا
مش ف صالحى أو ف صالحَك
إن مشوارنا دا يِكْمَل
لو هترضى تغش نفسَك
مستحيل أنا ممكن أقبَل
مش هقول كان لِعب بيّا
مش هقول إنى اتخدعت
بس أحسن .. ليك وليّا
تمشى وتقول انسحبت
إنتَ حبّيت تبقى ليّا
بس حاولت وفشلت
لو نكمّل لحظة تانية
نِبقى بنضيَّع فى وقت.
ورقة وقلم
