عصابة الاصدقاء الثلاثة يعترفون: "الدنيا قافلة بابها فى وشنا ومش لاقين شغل فقررنا نثبت الناس ونسرقهم.. انتحلنا صفة ضباط شرطة وكنا بنختار طلاب المدارس.. وكنا بنقول احنا تبع مديرية أمن الجيزه"

" إحنا اصحاب من فترة طويلة، وعشان الدنيا قافلة بابها فى وشنا، ومش لاقين شغل ولا فرصة عمل محترمة توفر لنا فلوس نقدر نعيي شبيها زى البنى ادمين، قررنا نشوف طريقة نقدر من خلالها نحصل على اللى احنا عايزينه، وبدون تعب وفى أسرع وقت كمان، فكرنا فى اكتر من وسيلة عشان يبقى معانا فلوس كتير، لحد ما اتفقنا اننا نثبت الناس وناخد منهم التليفونات والفلوس اللى معاهم، لكن مش هنثبتهم بالسلاح زى ما المسجلين خطر والبلطجية بيعملوا، احنا هنسرقهم بس بذكاء، قررنا اننا هننتحل صفة ضباط وأمناء شرطة ونختار الضحية من الأعمار الصغيرة اللى ممكن يدخل عليهم الشغل اللى بنعمله وميقدرش يطلب مننا أى أوراق إثبات شخصية او كارنيهات، وكنا بنختار طلاب الثانوى والجامعات اللى رايحين او راجعيين من الدراسة، وبنقولهم احنا من مديرية امن الجيزه واننا مشتبهين فيهم وبنفتشهم وفى لحظات سريعة بناخد اللى معاهم ونهرب.

وأضاف المتهمين الثلاثة الذين تم القبض عليهم لاتهامهم بتكوين تشكيل عصابى تخصص فى إنتحال صفة ضباط شرطة للاحتيال على المواطنين بالجيزه خلال إعترافاتهم امام رجال المباحث " احنا كنا بنستخدم عربية او "موتوسيكل" أثناء تثبيت الضحية، بنتمشى فى الشوارع العامة وخاصة فى مدينة 6 اكتوبر لحد ما عينينا تقع على الضحية، ونوقفه وناخد منه كل اللى فى جيبه وتليفونه كمان، والحكاية دى اكررت كتير وسرقنا فلوس وتليفونات كتير لحد ما اتقبض علينا واتمسكت معانا المسروقات".

وقال المتهمين الثلاثة " كنا بنختار مدينة 6 اكتوبر بالذات عشان ننفذ اللى احنا عايزينه وننصب على الناس لانها مدينة هادية وسهل انك تثبت اى حد وتهرب، وكمان فى مناطق بتساعد على الهرب زى المناطق الصحراوية والجبلية اللى ممكن نلجأ ليها لو حصلت مطارده من المباحث".

مصدر أمنى بمديرية أمن الجيزه ذكر أنه تم الكشف عن نشاط المتهمين بعد تعدد البلاغات امام اللواء مجدى عبد العال مدير الادارة العامة لمباحث الجيزه تفيد بتعرض عدد من المواطنين للنصب والسرقة على يد 3 اشخاص يدعون أنهما شرطة تابعين لمديرية امن الجيزه الا أن الضحايا يكتشفون تعرضهم للاحتيال وأنهم وقعوا فريسة لإحدى العصابات .

وتوصلت التحريات على أن العديد من تلك البلاغات حدثت بدائرة قسم شرطة ثان أكتوبر، ومن خلال تكثيف التحريات توصل النقيب محمد الصعيدى معاون مباحث قسم شرطة ثان أكتوبر إلى أن 3 عاطلين وراء ارتكاب تلك الوقائع ونجح فى تحديد هويتهم والاماكن التى يترددون عليها

وبإعداد عدة أكمنة للمتهمين تمكن من القبض عليهم وضبط بحوزتهم سيارة ودراجة بخارية وعدد من الهواتف المحمولة

وبمواجهة المتهمين إعترفوا أمام العميد محى سلامة رئيس مباحث قطاع أكتوبر أنهم يكونون تشكيل عصابى للنصب على المواطنين وسرقة محتوياتهم، واضافوا ان السيارة والدراجة البخارية المضبوطين بحوزتهم يستخدمونها فى تنفيذ جرائمهم، وذكروا ان الهواتف التى بحوزتهم استولوا عليها من ضحاياهم
وبإستدعاء اصحاب البلاغات الذين تعرضوا للنصب على يد المتهمين تعرفوا عليهم واتهمومهم بالسرقة، فحرر محضر بالواقعة وأخطر اللواء طارق نصر مساعد وزير الداخليه لامن الجيزه الذى أحال المتهمين إلى النيابة للتحقيق.