وتباينت ردود الأفعال للمواطنين على الصفحة الرسمية لوزارة الداخلية على "فيس بوك"، حيث قال المواطن على زيدان: "طول ما ضابط الشرطة بيتعامل على أنه فوق القانون، وأنهم أسياد والباقى عبيد، كل ما التجاوزات هتزيد.. والسبب هو اللى قيادتهم بتغرسه فيهم فى الكلية أنهم لازم يعاملوا الناس من فوق".
ووجه أيمن المنسى رسالة للوزير قال فيها: "سيدى الوزير.. يبدو أن الصورة المنقوله لسيادتكم عن المعامله داخل أقسام الشرطة مغلوطه تماما.. هذا واقع ملموس لدينا كمواطنين، نتعامل مع الأقسام مباشرة.. وعلى سبيل المثال قسم شرطة العبور يلفق قضايا حتى الآن بعد أن وقفنا أثناء الثورة فى مواجهة البلطجية بدلا منهم، وحماية لهم.. هل هذا جزاء الجميل.. فبرجاء زيارة مفاجئه لهم وإلزامهم بحسن التعامل مع المواطن داخل وخارج القسم للتقدم خطوة وليس الرجوع خطوات من أفعالهم.. وشكرا لمجهودات الشرفاء من جهاز الشرطة.. وفقكم الله وشكرا".
وقالت سيدة تدعى "بوسى": "أنا مواطنة ومش عارفه أكتب رسالتى فين.. أنا من الفيوم وعاوزه أشكر الضباط وأمناء الشرطة الموجودين فى ميدان المسلة، على تعاونهم مع أهالى دله فى دخول السرفيس داخل دله.. وزير الدخليه بالرجاء تكريم أو حتى شكر للضباط الواقفين هناك.. والله الضابط شال الأولاد مع أم ماشيه فى الشارع وساعدها وركبها بنفسه وده شئ جميل يستحق منا الشكر".
وناشدت "إيناس علاء" وزير الداخلية قائلة:"معالى الوزير.. أى فرد شرطه بيعامل الجمهور ويرتشى بيعمل حاجات مش تمام على طول حولوه للنيابة وطهروا الشرطة من الظالمين.. الله يكون فى عونكم يارب".
وقال ياسر المهدى: "ضباط كتير من الشرطة ناس محترمة وأصحاب رسالة، وكثير من أمناء الشرطة وقلة من الضباط عندهم الرسالة الشرطية الشريفة مهنة الهدف منها التربح والكسب الوفير عن طريق إرهاب الناس.. وشوفت بعينى أمناء شرطة بتقطع الطريق على الناس وتاخدهم على جنب وتفتشهم، وممكن تعجبه حاجه معك يخدها يا إما تلبس قضية.. وكافة أنواع المخدرات فى جيبهم جاهزة يقولو بتعتك".
وقال على كمال:"هو فيه قلة من الضباط وأمناء الشرطة بيسيئوا للشرطه ككل ودول بيتحاسبوا.. لكن مش لازم نهاجم الشرطة كلها ونقعد نهرى.. افتكروا إن فيه ضباط شرطة وجنود وأمناء شرفاء بيضحوا بارواحهم علشان أمن البلد.. مش كل حاجة وحشة".
وطالب "شريف صبحى" بعدة مطالب قائلا: "تعميم كاميرات متصلة على الإنترنت لمراقبة الأقسام وغرف الحجز.. وده ممكن الشعب كله يساهم بتقديم المال اللازم لتنفيذ هذا.. والقانون فوق الجميع.. من يعمل فى الداخلية كمن يعمل فى أى هيئة مدنية.. لاميزة له إلا تنفيذ القانون بدون تجاوزات".
وقال "جودة شوشة": "ليه معلقين على الشرطة وتجاوزاتها.. علشان بتمس الناس.. طيب مالتجاوزات فى كل مجالات العمل والحياة وبتمس الناس.. الشرطة بتتعامل مع الشعب وبالأخص فئة تستحق العنف وهم المجرمون ومن يضرون الناس وأملاكهم.. كفاية وخلوا الشرطة فى حالها وبلاش نعمل هيئة على حاجة بتحصل وهاتفضل تحصل فى كل أنحاء العالم.. مع الإعتذار لنشطاء حقوق الإنسان".
موضوعات متعلقة..
وزير الداخلية: لا يوجد تعذيب ممنهج فى الأقسام.. والشرطة سمعتها طيبة فى مصر
