وزير النقل يستشهد بتحقيق"اليوم السابع" عن فساد أراضى السكة الحديد..الجيوشى لقيادات الوزارة: تركتم الأراضى للبلطجية.. وأهملتوا استثمارها.. "ومينفعش مسئول الصيانة يكون مش عارف عدد الجرارات العطلانة"

- الوزير:موظف سألنى "هو المسئول اللى بياخد 40 ألف جنيه بيعمل بيهم إيه فى الشهر وأنا باخد 1200 جنيه؟"..ومعرفتش أجاوب عليه لأن عنده حق

-

وزير النقل منتقدا إسناد منصب نائب رئيس السكة الحديد للموارد البشرية لغير متخصص:إزاى مهندس ميكانيكا يمسك موارد بشرية

-

الجيوشى: بلاش تعطوا تصاريح السفر المجانية بالقطارات للكبار.. اعطوها للموظفين الغلابة اللى مش لاقين ثمن التذكرة

عنف الدكتور سعد الجيوشى وزير النقل المسئولين فى السكة الحديد عن تردى أوضاع الهيئة خلال اجتماعه اليوم مع رؤساء وقيادات هيئات وشركات وقطاعات الوزارة، مستشهدا بتحقيق "اليوم السابع" عن فساد أراضى السكة الحديد وإسقاط الهيئة استثمار 191 مليون متر مربع مملوكة للهيئة، مستطردا: "لقيت صحفى كاتب عن أراضى السكة الحديد ولما سألت وجدت كلامه مظبوط.. ولقيت أراضى الهيئة متسابة للبلطجية والمتعدين عليها".



وأكد وزير النقل خلال اجتماعه، أنه اكتشف أن الشركة المصرية لمشروعات السكك الحديد والنقل المملوكة للهيئة أهملت استثمار الأراضى المملوكة للسكة الحديد وركزت فقط على بناء بعض العمارات السكنية، ولم تستثمر أراضى الهيئة، مستطردا: "المحافظين عاوزين يأخدوا أراضى السكة الحديد عشان الهيئة تركتها للبلطجية.. لقونا سبنا أرض الهيئة وهما عاوزين يستفيدوا منها طالما أنتوا مش عارفين تسثتمروها.. ده ينفع؟".

وواصل وزير النقل تعنيفه لمسئولى السكة الحديد قائلا: "ينفع أسأل المهندس وجدى المرسى رئيس الإدارة المركزية للصيانة عن عدد الجرارات العطلانة وميعرفشى يجاوب.. طب لما مسئول الصيانة مش عارف عدد جرارات القطارات العطلانة طب مين اللى يعرف"، ساخرا: "يا جماعة ينفع مسئول الصيانة مش عارف عدد الجرارات اللى عطلانة واللى شغالة أمال عارف إيه؟!".



وأضاف وزير النقل:"فيه موظف بالسكة الحديد سألنى هو المسئول اللى بيأخد 40 ألف جنيه فى الشهر بيعمل بهم إيه فى الشهر.. وـنا باخد 1200 جنيه مش مكفين حاجة"، مستطردا: "معرفتش أجاوب على الموظف.. هو عنده حق.. كمان أنتوا بتشغلّوا عمالة مؤقتة وبطفحوها القوتة وبتعطوهم 250 جنيها فى الشهر.. طب يعملوا بهم إيه دول.. شوفوا لهم حل".

وعبر وزير النقل عن اندهاشه من تولى المهندس مصطفى أبو المكارم منصب نائب رئيس الهيئة للموارد البشرية رغم أن تخصصه هندسة مكيانيكا قائلا: "إزاى مهندس ميكانيكا يكون مسئولا عن الموارد البشرية بالهيئة.. إيه علاقة الميكانيكا بالموارد بالموارد البشرية؟"، مؤكدا عدم موافقته على تصاريح السفر المجانية بالقطارات، مستطردا:"التصاريح أنا مش موافق عليها.. عاوز تعطى اعطى الموظف الغلبان اللى مش لاقى ثمن التذكرة.. تعطى المسئولين الكبار ليه؟.. أنا مرة ركبت القطار ووجدت أنى أنا الوحيد اللى راكب بفلوس.. وباقى كل اللى فى العربة اللى أنا راكب فيها راكبين ببلاش".



فيما أشاد وزير النقل خلال اجتماعه برئيس وقيادات الطرق والكبارى وأكد رضاه عن أدائهم، فيما قال إنه يتابع مشروعات التطوير الذى ينفذه قيادات هيئات الموانئ والنقل البحرى، وأكد فى نهاية الاجتماع أنه سيعقد اجتماعا شهريا مع كافة رؤساء وقيادات قطاعات الوزارة، وسيتلقى تقريرا عن أدائهم لتقييم عملهم بالهيئات والشركات.

موضوعات متعلقة..

السكة الحديد تسقط استثمار 191 مليون متر أراضى تملكها من حساباتها.. وتتجاهل الاستغلال الإعلانى لمحطاتها وقطاراتها.. وتلجأ للحل السريع لزيادة إيراداتها عبر رفع أسعار تذاكر القطارات على الغلابة