أنا قلت لجدى.. يا جدو
تعالى آخدلك سيلفى..
مصمص جدو شفايفه..
وقالى ربنا يشفى..
يا جدو بجد افهمنى..
أنا مش تعبان صدقنى..
أنا عاوز آخدلك صورة..
تبقى للذكرى فى قلبى..
والنبى تسمعنى يا جدو..
وتسيبنى آخدلك سيلفى..
جدو فقد أعصابه..
وقلع قدامى شرابه..
وقالى الله يسمحك..
ابعد عن وشى يا مخفى..
ويا ناس أنا عقلى اجنن..
مش ممكن أبدا أسلِّمْ..
وإن كان على جدو حبيبى..
أنا لازم آخد حقى..
واقنعك إزاى يا سى جدو..
يا جدو السيلفى دا صورة..
هارفعها عالأكاونت..
وأعملك أجمد لايك..
وأهريك كومنت عليها..
وأشير ودا من حقى..
راح جدى قايم من نومه..
ومغير باقى هدومه..
ومنادى بأعلى صوته..
يا ولاد أنا هاحلق دقنى..
وأساوى الباقى فى شنبى..
وآخد من إيده.. ميدو..
يمكن ربنا يهدى..
دا الواد تعبان من بدرى..
ادعوله ربنا يشفى..
الواد لسَّاه مستهوى..
مزكوم بالنيله.. السيلفى..
صورة ارشيفية
