ياأم العيون السود
والرمش كحال
والقلب من عشقها
قال فى الهوى موال
حبك قدر مكتوب
ولا كان خاطرلى فبال
حيرنى غير دنيتى
وخلى حالتى حال
خلى النهار فى ثوانى
والليالى سنين طوال
وآدى النجوم صاحبتى
والقمر لقلبى خال
ياأم العيون السود
ورمشها كحال
****
ياأم أجمل عود
سبحانه من صور
ووردتين على الخد
يا بدر يا منور
وشعرك المفرود
وكلامك السكر
ورمشك الفتان
وشفايفك المرمر
لو أوصفك فى سنين
أتمنى أقول أكتر
أنا اللى قلبى صبر
لكنه برده نال
أم العيون السود
ورمشها كحال
****
ياأم أجمل قد
ولا فيه فى حسنك حد
ولو يعدوا خصالك
ما يبطلوا فى العد
وضحكتك موزونة
والجد عندك جد
والحسن لو يتفرق
فى الأصل ليكى ارتد
أنا اللى عاشق رقتك
وأنا اللى قلبى مال
لأم العيون السود
ورمشها كحال
عيون جميلة - صورة أرشيفية
