تكثر فى العيد حفلات الزفاف والخطوبة، إضافة إلى جلسات التعارف التى يلتقى خلالها المقبلين على الزواج لاسيما فى ظل زيادة التجمعات العائلية ولم شمل الأصدقاء، لذا فكر بعض المشاركين على موقع "تويتر" أن يحكوا عن ذكرياتهم فى جلسات تعارف زواج "الصالونات"، وأغرب المواقف التى تعرضوا لها تحت هاشتاج باسم "أغرب العرسان فى التاريخ"، وآخر باسم "أغرب عروسة اتقدمت لها".
فكتبوا عن "أغرب العرسان فى التاريخ" "موظف من الجالية الباكستانية معى فى العمل.. عقد القِران عمله عن طريق مكالمة فيديو فى برنامج (Skype)"، وتحكى فتاة "كان فى واحد غريب كده وأسئلته عجيبة زيه، قالى أنا حطيت رجل على رجل كام مرة أول مرة شفته، وإن عندى تسع حسنات فى وشى"، و"واحد جاى يسأل عنى وهو ميعرفش شكلى أصلا.. جه وسألنى وأنا قولت له لأ دى متجوزة"، فيما حكى آخر عن "العريس اللى جاب شبكة فالصو! واتعرفت بالصدفة لما الخطوبة اتفركشت والعروسة كشفت على الشبكة لقيتها فالصو".
بينما ثأر الشباب لسخرية الفتيات من "أغرب العرسان" فحكوا عن "أغرب عروسة اتقدمت لها" فكان من أبرز المواقف "رحت مرة أشوف عروسة مدرسة، أبوها قاللى أصلها رافضة الجواز علشان بتجيلها فلوس كويسة من الدروس، شوف أختها مش عاوزة تشتغل"، و"عروسة رحنا نشوفها أنا وأخويا تانى يوم العيد كانت قمر رحنا نشوفها فى بيتهم ونتقدم نزلت واحدة تانية خالص من غير ميك آب"، و"صاحبى راح يخطب واحدة مدرسة أبوها قاله تاخد أنت الفرخة وإحنا ناخد البيض (يقصد مرتبها)، رد صاحبى خليهالكم ببيضها".
وفى منطقة الحياد، علق آخرون قائلين "الخلاصة أن الفجوة الزمنية السحيقة بين مجتمع أمينة ومجتمع نيكول سابا عملت أزمة فى دماغ الرجالة والستات"، و"المواقف اللى بيحكوها الاتنين بتثبت إن جواز الصالونات فاشل، والناس عارفة إنه فاشل ومع ذلك بيتجوزوا صالونات".
