صوتك والنسر والخفافيش واسمه صباحى ثلاث قصائد لأشرف الشافعى

صوتك

صوتك كمـا عرضك مساسه بدم
والعــرض غــالى ع الرجال ياعـم
إطلق سهــام غضبه على الجُبنا
وُشق راس الأفعـــــى ولا تهتــم

صوتك بيخزى طــابور من الأندال
فإيــاك تبيعه بمــال ولا بِعـــــزال
نور العيـون والـدم كـــانوا التمن
دفعوه عشــان تتعدِل الأحــــوال

صوتك ماهوش بوابة للســافل
واللــى بيفتكــرك عبيـط غافل
طبع الشِحاته مش ف عوايدنا
ولو نموت م الجوع ما نتساهل

صــوتك عــــزيز للحـر والمَجـــــدِع
اللى لاعمـــــره يخــون ولا يخدع
واللى قاسمته نومته ع الأسفلت
وكتفه كـــان وقت التعــب مخــدَع

صوتك بيخسف ناس ويرفـع ناس
صوتك كما كفـة ميزان حسـاس
زى البصــــر ف عنيك يبان عادى
لكن ماتوزنهوش جبـال من ماس

صوتك دفـا بيتك ف ليل البرد
وربيـــع ولادك اللى زى الورد
تدبل غصونهم لو تفـــرط فيه
تقوى حصونهم لو تأديه فرض

صوتِك يا خـــالة هـو ستر الــــدار
إحساس أمان قصاد زمن غـــدار
ضحك السنين الجاية لجل الضنا
وفرحة واصلة لحـد ســـابع جـار

صــــوتك يا بلدينـــا دا تحـويشتك
زهرة شقــــاك وضـل تعريشتك
لو كان عفى دنيــــاك ح تحلالك
وان ينطفى يملا المرار عيشتك

صـــوتك ضميـــرك لو يمــوت حتمـوت
وان خنتـه صعب تلاقى تانى شطوط
حتعيش طريد حضن الحيــاه والناس
عشان ساومت على الشرف بالموت

صوتك ميدان العــــدل رمز الجَلَدْ
رجْعّت بيه حـق اللى ياما اتجَـلَدْ
هتفت بيه هزيت عروش حكـــام
قوم هات بقى بكــره يليق بالبلد

وابقى افتكرهم ف الدعا والفرح
اللى بدِمــــاهم آن اوان الطــرح
عاشوا ومـــاتوا ومصــــر جـوّاهم
وعـــدوا بيها م الهـــوان والجـرح

النسر والخفافيش

لكـل حــلم بنحلمــــه بــداية
ولكل خطوة ف الطريق صاحب
وانت نويت ع الصدق ف الغاية
وحلمنا على حلمك اتصـاحب

مش محتاجين نقرا التاريخ تانى
حـافظينه زى ما احنا حـــافظينك
ولــو نطـــق ح يرد ف ثــــــوانى
يشهـــد ما مـالت يوم مـوازينك

صـــــرخت لما سكتت الأقــوال
وقولتهــــا برجـــــولة وبســالة
لو نرضى يحكمنا ف بلدنا "جمال"
يبقى البـــــلد ماجبتش رجـالة

دافعت عن ناســــك قصاد القصر
وقطعت خط الرجعة ع الإشاعات
للفــلاحين والشقيانين ولمصــر
ومش عشان أحزاب ولا جماعات

مانتش ولى بمعجزة وكــــرامات
ولا كنـا يوم فى حضـرتك دراويش
لكن الشرف تمللى لـه عــلامات
يفـرق مابين النسر والخفــافيش

اسمه صباحى

جايز تكــون شهادتى مجروحـة
علشـان بيحلم حلــم يقــربلى
حلمت بيه ف الجيــة والروحــة
مع أنه عمـره ماكــان بيقــربلى
لكن الحكــاية ف أصلهـــا مبـدأ
ورانى مين كداب ومين أصـدق
نبضــة ضميـرى الحـر بتصـدّق
اللى عليـــا يخـــاف و يغضبلى

مصراللى تشبهله ف ملامحها
محتــاجة قلب كبير يليق بيهـا
ف كـــل حـاجة فيه بنلمحـــها
ومافيش عيوب عنـــده يخبيها
من صـرخته ف وش طواغيتهـا
لوقفته مع فـلاحين غيطهــــــا
لهبتــه لحــــــظة مابيغيتهـــــا
آن الآوان معــــــــانا يبنيهـــــــا

مصــــــر اللى بيصـونهـا كما عيــاله
ف كـــل شبر ف أرضهـــــا مطـــــرح
يامــا ندهـله ف شــــــدته وجـــــاله
وحاســه إمتى بيبكــــــى وبيفـــرح
قالــــوها أهـل بلـــدنا ف الأمثــــال
الأصـل هــو الصـــــــدق ف الأفعــال
وماعدش فيه للشــك تانى مجــال
بين اللى طبطب واللى عاش يجرح

النـــاس ماهش عايشـة ف غيبــوبة
وأصغــــــر ما فيهـم مخـــه يوزن بلـــد
فاهــمة اللى واخــــد مصـر سبـــوبة
واللى اتسجـن وعشانها يامـا اتجـلد
ومافيـش ملاك حكم البشر ع الأرض
وكلــه دين ح ييجى يـــوم يتـــــــــرد
والعبـرة باللى يصون كـــرامة وعرض
وخطـــــــوته بضميـــره محســــــوبة

قــال التـــــاريخ ف كتـاب حكــــاياته
حكم الشعوب محتاج ضمير صاحى
يبقى الوطـن أحلامـــــه وغــــــاياته
وعشــانه يسهـــر ليلـــــه صبَـاحى
كل اللى مــــادد إيده على راسـنــا
ماهــوش غـريب وبرضه من ناســنا
لكــن اللى فــــــاهم معنى ريسنـا
يشهــد تاريخــه واسمــــه صباحى